Azərbaycan bu çətinlikləri də geridə qoyacaq - AÇIQLAMA
"Bu gün qlobal çağırışlardan biri iqlim dəyişikliyinə qarşı mübarizə və bununla əlaqədar olara yaşıl enerjiyə keçid məsələsidir. Son illərdə bu istiqamətdə ciddi addımlar atılmaqdadır. Azərbaycan da iqlim dəyişikliyinə qarşı mübarizədə və yaşıl enerjiyə keçiddə günümüz üçün aktual olan qlobal çağırışlara çevik reaksiya verməklə bu sahəyə öz töhfəsini verməyi qarşıya strateji hədəf kimi qoyub. Azərbaycan qazıntı enerji sahəsində olduğu kimi, yaşıl enerji sahəsində də qlobal bazarda, xüsusən də, Avropanın enerji təhlükəsizliyinin daha etirbalı şəkildə təmin olunmasında aktiv oyunçu rolunda çıxış etmək istəyir. Ona görə də Azərbaycan bu sahədə mövcud olan potensialından faydalanmaqla enerji sektorunu şaxələndirib bərpaolunan və alternativ enerji sahəsində ilkin uğurlara imza atmaqdadır".
Bunu Ölkə.Az-a açıqlamasında deputat İltizam Yusifov Azərbaycan Prezidentinin “Euronews”a müsahibəsini şərh edərkən deyib.
O əlavə edib ki, Azərbaycan qlobal iqlim dəyişikliyinə mübarizədə öz töhfəsini vermək məqsədilə yeni inkişaf strategiyası hazırlayaraq bunu addım-addım həyata keçirməkdədir: "Biz bunu Azərbaycanın enerji strategiyasında yeni erası da adlandıra bilərik. Azərbaycan son illərdə bu istiqamətdə ciddi addımlar ataraq bir sıra beynəlxalq layihələri icra etməkədir. Belə ki, Azərbaycan təkcə bu gün yaşıl enerjiyə keçiddə alternativ və bərpaolunan enerjiyə keçidlə kifayətlənmir, eyni zamanda əldə ediləcək enerjinin ixracı istiqamətində real addımlar atmaqdadır. Azərbaycan istehlak ediləcək yaşıl enerjinin Avropaya icracı məqsədi ilə hələ 2022-ci ildə Rumıniyada “Azərbaycan Respublikası, Gürcüstan, Rumıniya və Macarıstan Hökumətləri arasında yaşıl enerjinin inkişafı və ötürülməsi sahəsində strateji tərəfdaşlıq haqqında Saziş”in imzalanması mərasimini keçirdi. Hələ o zaman cənab Prezident İlham Əliyev məsələnin əhəmiyətinə toxunaraq bəyan edib ki, bu gün biz Avropaya digər enerji körpüsünü salmağa başlayırıq: "Ölkəmiz Avropanın mühüm elektrik enerjisi, əsasən, yaşıl enerji təchizatçısına çevrilməyi planlaşdırır. Azərbaycanın bərpaolunan enerji potensialına gəldikdə, quruda külək və günəş enerjisinin həcmi 27 qiqavatdan çoxdur, Xəzər dənizinin Azərbaycan sektorunda isə külək enerjisi 157 qiqavat təşkil edir. Ölkəmizin strateji investorlarının biri ilə biz 2027-ci ilə qədər 3 qiqavat külək və 1 qiqavat günəş enerjisini istehsal etməyi planlaşdırırıq. Onların 80 faizi ixrac olunacaq. Biz 2037-ci ilə qədər ən azı 6 qiqavatlıq əlavə gücləri yaratmağı planlaşdırırıq”.
Bununla da Azərbaycan neft-qazla yanaşı, elektrik enerjisi sahəsində də Avropanın mühüm təchizatçılarından birinə çevrilmək niyyətindədir. Ona görə də bu sahədəki layihələr uğurla icra olunmaqdadır".
Deputat bildirib ki, artıq beynəlxaql səviyyəli şirkətlər Azərbaycanda yaşıl enerjiyə keçid sahəsinə böyük həcmdə sərmayə qoymaqda maraqlıdır. "Birləşmiş Ərəb Əmirliyinin bu sahədə böyük təcrübəsi olan “Masdar” şirkəti Azərbaycanın strateji tərəfdaş hesab olunur. Bundan əlavə olaraq Səudiyyə Ərəbistanın “ACWA Power” şirkəti, BP şirkəti bu prosesdə yaxından iştirak edir. Ümumiyyətlə bu sahəyə sərmayə qoymaq istəyən çoxsaylı xarici investorlar var", - o qeyd edib.
Deputat qeyd edib ki, Azərbaycanın bu uğurlarının kökündə ənənəvi enerjidən əldə etdiyi gəlirləri hazırda bərpaolunan enerjiyə yönəltməsidir. "Azərbaycan necə ki, neft strategiyasından istifadə etməklə qarşısında duran hədəflərə nail olmuşdusa, iqlim dəyişikliyinə qarşı mübarizədə yaşıl enerjiyə keçid edib bu sahədə ciddi oyunçu olmaqla qarşısındakı növbəti hədəflərə nail olacaq. Azərbaycan yaşıl enerjiyə keçidlə həm iqlim dəyişikliyinə qarşı mübarizədə ciddi oyunçu olub qlobal enerji təhlükəsizliyində aktiv iştirak edəcək. həm də ölkəmizin iqtisadi gücünü artırmaqla təhlükəsizliyinin etibarlı şəkildə təmin olunması nail olmaqla yanaşı, böyük nüfuz sahibi olacaq. Azərbaycanın COP29-a ev sahibliyi etməsi də bunun bariz nümunəsidir. Əminliklə deyə bilərəm ki, bu sahədə çətinliklər olsa da, Azərbaycan indiyədək olan çətinlikləri necə aşdısa, yaşıl enerjiyə keçid prosesində də qarşısındakı bütün əngəllikləri geridə qoyaraq üzərinə düşən öhdəlikləri həyata keçirməklə yeni uğurlara imza atacaq".
Mürtəza
Ölkə.Az
