İranda prezidentliyə namizədlər seçkilərdə iştirakdan imtina etdilər - FOTO

İranın vitse-prezidenti Əmir Hüseyn Qazizadə Haşimi prezident seçkilərində namizədliyini geri götürdüyünü açıqlayıb.

Ölkə.Az xəbər verir ki, Haşimi seçki marafonundan geri çəkilməsi barədə bəyanatını X (tvitter) sosial şəbəkəsindəki səhifəsində dərc edib.

“İnqilab qüvvələrinin birliyini qorumaq üçün və İslam İnqilabı Qüvvələrinin Koalisiya Şurasının, eləcə də bəzi üləma və rəğbətli şəxslərin xahişinə cavab olaraq, seçkidə iştirakdan imtina etdim. Ümid edirəm ki, digər üç qardaşım fürsətdən istifadə edərək hərəkat inqilabını birləşdirib gücləndirəcəklər”, - Haşimi bəyan edib.

Qazizadə Haşiminin sözlərinə görə, indi onun vəzifəsi ölkənin maraqlarını qorumaqdır.

Digər prezidentliyə namizəd Tehran meri Əlirza Zəkani də prezident seçkilərində iştirakdan imtina edib.

Seçkidən imtina edən Zəkani X (tvitter) sosial şəbəkəsindəki hesabında yazıb: "Seçki marafonunun sonuna qədər qaldım, lakin şəhid Rəisinin yolunun davamı daha önəmlidir. Mən Cəlili və Qalibafdan birləşərək inqilabi qüvvələrin haqlı tələblərini cavabsız qoymamalarını və Ruhaninin üçüncü hökumətinin qurulmasına mane olmalarını xahiş edirəm. Dəyərli insanlara və tərəfdarlara minnətdaram və tənqiddən qorxmuram".

Mürtəza
Ölkə.Az