Türkiyə Azərbaycan münasibətlərinə xələl gətirmək istəyənlər - Bilməlidirlər ki, öz başları bu oyunda gedəcək
Türkiyə-Azərbaycan qardaşlığı tarixin ağır sınaqlarından şərəflə çıxdığından bu gün iki qardaş dövlət arasındakı münasibətlər də sarsılmaz əsaslar üzərində qurulub. Bu səbəbdən də Türkiyə-Azərbaycan qardaşlığı dünyaya nümunə kimi göstərilir.
Türkiyə və Azərbaycan münasibətləri Mustafa Kamal Atatürkün “Azərbaycanın sevinci bizim sevincimiz, kədəri bizim kədərimizdir”, Heydər Əliyevin “Bir millət, iki dövlət” prinsipi əsasında inkişaf etməkdədir. XX və XXI əsrə nəzər salmaqla biz bu şüarlar sözdə deyil, əməldə həyata keçdiyinin şahidi olmuş olarıq. Bu münasibətlər Azərbaycanın XX əsrin sonunda müstəqilliyini yenidən bərpa etdikdən sonra daha da inkişaf edib və hazırda strateji müttəfiqlik münasibətləri səviyyəsinə çatdırılıb. Təbii ki, münasibətlərin belə yüksək səviyyəyə çatdırılmasında Azərbaycan Prezidenti cənab İlham Əliyevlə Türkiyə Prezidenti Rəcəb Tayyib Ərdoğan arasındakı çox sıx qardaşlıq, dostluq münasibətləri də xüsusi rol oynayıb.
Azərbaycan və Türkiyə "bir millət, iki dövlət", "sevinciniz sevincimiz, kədəriniz kədərimizdir" prinsipinə uyğun olaraq hər zaman bir-birinin yanında olub və bir-birinə dəstək verib. Faktları sadalasaq çox uzun zaman alar. Bir də bunu sadalamağa ehtiyac yoxdur.
Ancaq bəzi məqamları diqqətə yetirməkdə fayda var. Türkiyə Ermənistanın və onun havadarlarının ölkəmizə qarşı işğal siyasəti, Azərbaycan həqiqətlərinin beynəlxalq aləmə çatdırılması və bu işğala son verilməsi istiqamətində prosesin əvvəlində sonunadək Azərbaycanın yanında duran yeganə dövlət oldu. Və bu gün də bu dəstəyi verməkdədir.
İkinci Qarabağ müharibəsində Prezident Rəcəb Tayyib Ərdoğan başda olmaqla qardaş dövlətin, onun hökumətinin və xalqının Azərbaycana göstərdiyi siyasi-mənəvi dəstək yalnız işğal altındakı torpaqlarımızın azadlığının deyil, eyni zamanda Türkiyənin qətiyyətli mövqeyinin təntənəsi oldu. Bu, danılmaz faktdır.
Nəticə olaraq Qarabağ Zəfəri iki qardaş dövlətin və xalqın birlik təntənəsi idi. Məhz bunun nəticəsi olaraq iki qardaş ölkə arasında strateji müttəfiqlik haqqında Şuşa Bəyannaməsi imzalandı.
Azərbaycan da öz növbəsində Türkiyənin ən çətin günlərində yanında oldu. 2023-cü ilin fevralın 6-da dünyanı dəhşətə gətirən zəlzələdə Türkiyənin yanında ilk yer alan Azərbaycan oldu. 2023-cü ildə Türkiyəni cənginə alan meşə yanğınlarında da ilk yardıma qaçan Azərbaycan oldu. Bu faktları nə qədər desən uzatmaq olar. Sadəcə, bir neçə faktla onu demək istəyirəm ki, Türkiyə-Azərbaycan münasibətləri sarsılmaz prinsiplər əsasında qurulub və kimsə bu münasibətlərə xələl gətirə bilməz.
Xüsusən də Azərbaycan və Türkiyə liderləri cənab İlham Əliyevlə Rəcəb Tayyib Ərdoğan arasında elə dostluq və qardaşlıq münasibətləri yaranıb ki, kimsə buna şübhə edə bilməz. Məhz bu qardaşlıq münasibətində olan liderin birgə fəaliyyəti nəticəsində nəinki Azərbaycan və Türkiyə dünyanın yenidən şəkilləndirilməsində ən ciddi aktorlarına çevrilib, eyni zamanda Türk dünyası qlobal siyasi-iqtisadi güc kimi ortaya çıxıb.
Türkiyə Prezidenti Rəcəb Tayyib Ərdoğanla Azərbaycan Prezidenti İlham Əliyev arasında olan sarsılmaz dostluq və qardaşlıq münasibətləri haqqında isə yetərincə faktlar sadalamaq olar.
Bunun üçün hər iki qardaş ölkənin beynəlxalq platformalarda iştirakı zamanı protokol qaydalarından kənar səmimi münasibətləri və ya Türkiyənin olmadığı yerdə Azərbaycanın qardaş ölkə haqqında dediklərini misal çəkmək olar. Bunun bariz nümunəsi isə 2024-cü ilin yanvarın 10-da Azərbaycan Prezidenti İlham Əliyevin yerli televiziya kanallarına verdiyi müsahibədə jurnalistin "Dörd il bundan qabaq yanvar ayının 21-də Davos İqtisadi Forumunda Sizə bir moderator sual vermişdi: Cənab Prezident, Avrasiyada xeyli qüvvələr birləşib, Rusiya və Çin xatırlanmışdı və belə bir sual verilmişdi ki, Azərbaycan Prezidenti olaraq Siz, ilk növbədə, kimə zəng edərdiniz? Mən o sualın da, cavabın da verildiyi an orada idim və bu gün həmin sualı təkrarlamaq istəyirəm. Azərbaycan Respublikasının Prezidenti kimi Siz kimə zəng edərdiniz?" sualına belə cavab verib:
"Prinsipcə, deyə bilərəm ki, mən, ümumiyyətlə, çox nadir hallarda hansısa dövlət başçısını telefon zəngi ilə narahat edirəm. Çünki hesab edirəm ki, mənim həmkarlarımın hamısı çox məşğul insanlardır və elə bir ciddi mövzu yoxdur ki, bu mövzu ilə bağlı nəsə təcili demək lazımdır. Mən dövlət başçılarının bəzilərini ancaq onların doğum günlərində telefonla zəng edib təbrik edirəm. Əlbəttə ki, İkinci Qarabağ müharibəsi zamanı ən çox telefonla danışdığım insanlar Türkiyə Prezidenti və Rusiya Prezidenti idi. Bu da təbiidir, Türkiyə Prezidenti müharibənin ilk günündən son gününə qədər bizim yanımızda idi və Azərbaycana verdiyi siyasi və mənəvi dəstək bir çoxlarına bir mesaj idi. Bu, sadəcə olaraq, Azərbaycan xalqına həmrəylik və dəstək mesajı deyildi. Bu, müharibəyə qarışmaq istəyənlərə bir ciddi mesaj idi ki, kənarda durun. Ona görə Azərbaycan xalqı bunu heç vaxt unutmamalıdır və daim zəngləşirdik, söhbətləşirdik, mənim qardaşım Rəcəb Tayyib Ərdoğan maraqlanırdı müharibənin gedişatı ilə bağlı və məni Şuşa qələbəsi münasibətilə ilk təbrik edən də o olmuşdur.
... Amma yəqin bu gün əgər hansısa ciddi bir məsələ ölkəmiz qarşısında dursa, əlbəttə, ilk növbədə, qardaşım Rəcəb Tayyib Ərdoğana zəng edərəm, onu məlumatlandıraram". Bu cavab artıq hər şeyi deyir.
Amma və lakin... Bu gün Türkiyə-Azərbaycan və onun liderləri arasındakı bu qardaşlıq, dostluq münasibətləri nəinki bizi istəməyən düşmənlərimizin, hətta daxildəki bədxahların da yuxusuna haram qatıb. Hər fürsətdə iki qardaş dövlət, xalq və lider arasındakı münasibətlərə xələl gətirmək, buna kölgə salmaq üçün əllərindən gələni edirlər.
Bu gün həmin bədxahlar bir neçə gün öncə Türkiyə Prezidenti Rəcəb Tayyib Ərdoğanın Rizədəki çıxışı zamanı dünyanın müstəmləkəçi güclərinə ünvanına işlətdiyi "Qarabağa, Liviyiya necə girdiksə" sərt reaksiyasını tamamilə fərqli bir məcraya yönəltməyə çalışırlar. Təəssüf ki, burada həm Türkiyə, həm Azərbaycan daxilindəki anti-Türkiyə, anti-Azərbaycan güclərdən maliyyələşən qüvvələr öz ağalarının işinə yarımaq üçün belə cəhdlərdə bulunmaqdadırlar. Hər iki ölkənin daxilindəki bu bədxah güclər xaricdəki ağaları ilə sinxron fəaliyyət göstərərək ən xırda detaldan istifadə etməklə iki qardaş ölkə arasındakı münasibətlərə kölgə salmağa çalışırlar. Amma onlar unudurlar ki, bu cür ucuz metodlarla istəklərinə nail ola bilməycəklər. Hər iki ölkənin lideri bunun belə cılız düşüncəli insanların və ya qüvvələrin fərqində olduğundan belə məsələlərin fövqündə dayanırlar. Çünki onlar bunun haradan və necə qaynaqlandığını çox yaxşı bilirlər. Bu gün dünyada çoxsaylı güclərin və ölkələrin Azərbaycan-Türkiyə münasibətlərinə paxıllıq edib edib həsəd aparanların və bu münasibələri pozmaq istəyənlərin olduğunu da yaxşı bilirlər. Nəinki bilir və ya görürlər, gündəlik fəaliyyətlərində belə bu faktlarla rastlaşırlar. Məhz bunu bilib bu məsələlərin fövqündə dayandıqları üçün də kimsə iki qardaş ölkə lideri arasına girmə cəhdi hər zaman uğursuzluğa düçar olub və bundan sonra da belə niyyətləri puça çıxacaq. Bu iki qardaş ölkənin və liderinin arasına girmək istəyənin isə başı əziləcək.
Azərbaycan-Türkiyə münasibətləri bu iki liderin rəhbərliyi altında hələ çox uğurlara imza atacaq. Azərbaycan-Türkiyə birliyi Türk dünyasının yeni qlobal güc kimi formalaşaraq dünyanın qlobal təhlükəsizlik sisteminə, sülhə, sabitliyə və sıx əməkdaşlıq formatlarına öz töhfəsini verəcək.
Mürtəza Bünyadlı
Ölkə.Az
