Tural Abbaslı: Partiyada Arif Hacılıya rəqib olan istənilən şəxsin "torbası tikilir"

Tural Abbaslı Müsavat Partiyasının Divan üzvü Nemət Kərimlinin APA-ya açıqlamasında səsləndirdiyi fikirlərə münasibət bildirib.

Qeyd edək ki, Kərimli İltizam Əkbərli və Tural Abbaslının Müsavatın noyabrın 1-də keçirilən parlament seçkilərində iştirakı dayandırmaqla bağlı qərarına əməl etmədiklərini xatırladaraq, onlar barəsində tədbir görüləcəyini bildirib: “Onlarla bağlı məsələ kollegial qaydada müzakirə olunacaq və Nizamnaməyə uyğun qərar qəbul olunacaq. Nizamnamədə nəzərdə tutulur ki, hər hansı üzv partiyanın qərarına tabe olmursa, ya partiyadan çıxarılır, ya töhmət verilir, ya da xəbərdarlıq olunur. Bu baxımdan onlar partiyadan xaric də oluna bilərlər. Məsələyə konkret nə vaxt baxılacağını isə deyə bilmərəm”.

İ. Əkbərli isə APA-ya bildirib ki, partiyanın onun haqqında qəbul edəcəyi istənilən qərara hörmətlə yanaşacaq: “Mən seçicilərin qarşısında öhdəlik götürmüşdüm və bu öhdəliyi əsas gətirərək, seçkilərdə iştirak qərarını verdim. Əgər partiya rəhbərliyində mənim məsələm müzakirə olunarsa, qərardan asılı olmayaraq, buna hörmətlə yanaşacağam”.

Tural Abbaslı isə Ölkə.az-a açıqlamasında bildirib ki, ona qarşı partiya rəhbərliyi tərəfindən qərəzli münasibət var və Divanın qəbul edəcəyi istənilən qərara da hazırdır:

"Burada iki məsələ var. Bir partiyanın boykot qərarından sonra namizədlərini saxlayanlar, ikincisi partiya siyahısından kənar namizədliyini verənlərə münasibət. Təbii ki, partiyanın siyahısından kənar namizədliyini verənlərin məsələsinə baxa bilərlər. Mənim namizədliyimi partiyanın məclisi təsdiqləməmişdi. Halbuki bu qərarın özü də qərəzli idi. Çünki 2010-cu ildən bilinirdi ki, mən həmin dairədən namizəd olacağam. Hətta mənim və ətrafımda olan gənclərin hansı dairədən namizəd olacaqları siyahı şəklində partiyanın seçki qərargahında var idi. Sadəcə, sonradan partiya rəhbərliyinin göstərişi ilə bu adlar çıxarıldı və belə bir şərt irəli sürüldü ki, başqanın adına öhdəlik ərizəsi yazılmalıdır. Nəsimi rayonu ərazisində üç dairə olduğu halda, partiya məhz mənim namizəd olduğum 21 saylı dairədən namizəd irəli sürmüşdü. Halbuki digər iki dairədən Müsavat Partiyasının namizədi yox idi. Bunu həmin ərəfədə partiya rəhbərliyinin birbaşa qərəzi kimi qiymətləndirdik".

T.Abbaslı bildirib ki, ona və ətrafındakı gənclərə qarşı absurd tələblər irəli sürülüb və partiya rəhbərliyinin adına ərizə yazmaq tələb edilib:

"Bizə qarşı absurd tələblər irəli sürüldü ki, partiya rəhbərliyinin adına ərizə yazaq, xahiş-minnət edək. Və təbii ki, biz də bunu etmədik. Çünki bunları etmək öhdəliyimiz yox idi və partiya nizamnaməsinə də ziddir. Əgər təzyiq qarşısında geri çəkilən olsaydıq, hakimiyyətin təzyiqindən geri çəkilərdik. Sonra məlum oldu ki, boykot qərarı çıxarılıb".

Tural Abbaslı hesab edir ki, onların məsələsinə partiya divanında baxıla bilər. Ancaq obyektiv baxılması şübhə doğurur:

"O məsələyə necə baxılacağı, hansı müzakirələrin gedəcəyi şübhə altındadır. Çünki bu günə qədər sifarişli və qərəzli müzakirələr göz önündədir. Qubad İbadoğlunun, Səxavət Əlisoyun çıxarılması, Vurğun Əyyub məsələsi və sair ortadadır. Arif Hacılıya rəqib olan istənilən şəxsin məsələsinə baxılır və nizamnaməyə zidd qərarlar qəbul olunur".

Xatırladaq ki, Tural Abbaslı 21 saylı Nəsimi birinci Seçki Dairəsindən namizədliyini müstəqil şəkildə irəli sürmüşdü.

İntiqam VALEHOĞLU
Ölkə.az