İsgəndər Həmidov: \"Hamı yığışıb deməlidir ki, eşşək sizin özünüzsünüz!\"

İranda təhqir edilən Azərbaycan türkləri kütləvi etiraz aksiyasına başlayıb.

Aksiya bir neçə şəhəri əhatə edib. Küçələrə 10 minlərlə insan çıxıb. İran polisi isə aksiya iştirakçılarına qarşı güc tətbiq edir. Çoxlu sayda aksiya iştirakçısının həbs olunduğu bildirilir.

İranda baş verən proseslərə Milli Demokrat Bartiyasının sədri İsgəndər Həmidov Ölkə.Az-a verdiyi açıqlamasında münasibət bildirib:

"Həmişə demişəm türkün 5 düşməni var. Birincisi farsdı, 50 milyonluq türkü əlinin altında inildədir. Ana dilində məktəbin açılmasına da imkan vermir. Güneydəki azərbaycanlıları kökündən uzaqlaşdırmaq istəyir. Türkün ikinci düşməni yunandır. Üçüncüsü rusdur, dördüncüsü ermənidir, beşinci isə özümüzük - türk. Türkə həmişə yalnız türk qalib gəlib.

Farsın apardığı siyasət məni təəccübləndirmir. Farslar həmişə türklərə alçaqcasına münasibət bəsləyibər. Farslar həmişə bizə yuxarıdan aşağı baxıb. İranda keçirilən aksiyaları birmənalı şəkildə dəstkləyirik. Azərbaycanın siyasi partiyaları bəyanat verməlidir ki, "eşşək sizin özünüzsünüz". Türk dünyaya mədəniyyət gətirib, incəsənət gətirib, türk dövlətlər qurub. Türk heç vaxt heç bir millətin dininə, dilinə təcavüz etməyib. Türk belə bir millətdir.

Azərbaycan dövləti İran səfirini çağırıb nota verməlidir ki, 50 milyonluq milləti niyə təhqir edirsən? Xarici işlər naziri bu işə hökmən müdaxilə etməlidir. Milli dəyərlərin müdafiəsində müxalifət-iqtidar ola bilməz. Vahid millət kimi çıxış etmək lazımdır.

İranda mollaların fətvası ilə mənə ölüm cəzası verilib. Onsuz da Azərbaycan birləşəcək, paytaxtı da Təbriz olacaq. Biz də millətik birləşməyə haqqımız var. İran adını islam Respublikası qoyub. İslam peyğəmbəri Məhəmməd isə deyib ki, islam türkün yanında olarsa güclü olacaq".

Qeyd edək ki, Təbrizdə keçirilən aksiyada təxminən 10 000-dən çox insan iştirak edib.

Səxavət Məmməd
Ölkə.Az