Ermənistan prezidenti: Qarabağ ermənilərinin qayıtması... 

Ermənistan prezidentinin fikrincə, Qarabağı tərk etmiş ermənilərin geri qaytarılması ilə bağlı məsələlərə reallığın yaratdığı imkanlar çərçivəsindən baxmaq lazımdır.

Ölkə.az  xəbər verir ki, bunu Vaqn Xaçaturyan “Şant” televiziyasına müsahibəsində deyib.

“Hesab edirəm ki, biz Azərbaycanla münasibətləri həqiqətən sülh şəraitində qurarkən bu məsələni həll etməliyik. Biz realist olmalıyıq və bu, indiki vəziyyəti həqiqətən qiymətləndirmək deməkdir. Yəni bu gün belə qayıdış realdır, yoxsa yox? Axı burada həm də çoxlu müxtəlif amillər var. Təhlükəsizlik, Qarabağ erməniləri qarşısında müəyyən şərtlər qoyulacaq”, - Ermənistan prezidenti qeyd edib.

Xaçaturyan əlavə edib ki, bu məsələ hazırda sülh prosesinə mane olur. “Qarşı tərəf bizim ifadə etdiyimiz fikirlərlə razılaşmaya bilər. Fikir ayrılıqlarının mümkün qədər minimuma endirilməsi və aradan qaldırılması üçün danışıqlar aparılır ki, sonda ikitərəfli və ya çoxtərəfli sazişi nəzərdə tutan bir sənəd masaya qoyulsun”, - Ermənistan prezidenti bildirib.

Mürtəza
Ölkə.Az