Ermənilər bunu qulaqlarında sırğa etsələr yaxşı olar

"Son günlərdə Ermənistan tərəfindən "sülh sazişini imzalamağa hazırıq və istənilən an bu sənədi imzalaya bilərik" ifadəsi eşidilməkdədir. Ermənistan tərəfi belə bir bəyanatlarla çıxış etsə də, bölgədə dayanıqlı sülhü təmin edən şərtlərin yerinə yetirilməsi istiqamətində hər hansı ciddi addım atmır. Əksinə sülh danışıqlarından manipulyasiya edib Cənubi Qafqazda sülh prosesini pozub gərginliyin davam etdirilməsinə çalışır. Bu işdə Ermənistana Qərbdəki havadarları və digər qüvvələr də dəstək verir".

Bunu Ölkə.Az-a açıqlamasında deputat Kamran Bayramov deyib.

Deputat bildirib ki, İrəvan doğrudan da bölgədə dayanıqlı sülhdə maraqlıdırsa, o zaman sual olunur, niyə Ermənistan konstitusiyasında qonşu ölkələrə ərazi iddiası nəzərdə tutan müddəaları dəyişmək istiqamətində addımlar atmır: "Səbəb aydındır. Hər zaman olduğu kimi, İrəvan sülh prosesindən manipulyasiya edib yayınmaqla vaxt qazanıb prosesləri öz xeyrinə dəyişmək xülyası ilə yaşamaqdadır. Amma Ermənistanın bu xülyaları xülya olaraq qalacaq. Nə Ermənistan, nə də onun havadarları Cənubi Qafqazdakı xəyallarını reallaşdıra biləcəklər. O baxımdan da nə Ermənistanın silahlandırılması, nə də havadarlarının son vaxtlarda Azərbaycana qarşı başlatdıqları çirkin oyunlara xidmət edən iftira dolu qarayaxma kampaniyası nəticə verəcək. Azərbaycan buna imkan verməyəcək. Azərbaycan həm erməniləri, erməni lobbisini, həm də havadarlarını məyus edəcək və bundan uduzan tərəf yenə də özləri olacaq.
Ermənistan doğrudan da səmimi şəkildə sülh istəyirsə, o zaman Azərbaycanın bölgədə dayanıqlı sülh təşəbbüsü ilə bağlı uzatdığı sülh əlinə səmimi qaydada əl verib şərtləri təcili şəkildə həyata keçirməlidir. Yoxsa "sülh sazişi imzalamağa hazırıq" kimi nağıllarla artıq heç kimin başını aldatmaq mümkün deyil. Bu nağıllara dünya artıq inanmır. Belə nağıllarla Ermənistan əslində özünü aldadır və yeni-yeni uğursuzluqlara sürükləyir.

Digər tərəfdən sülh indi Azərbaycandan daha çox Ermənistana vacibdir. Azərbaycan öz ərazi bütövlüyünü, suverenliyini bərpa edib. Qarabağ və Şərqi Zəngəzurda həyatı yenidən bərpa edib inkişaf etdirməkdədir. Bir sözlə Azərbaycan gələcək inkişaf strategiyasına uyğun planlaşdırdığı siyasəti həyata keçirməkdədir. Azərbaycan sadəcə təkcə özünün deyil, bütövlükdə regionun inkişafında və sıx əməkdaşlığında maraqlı olduğu üçün dayanıqlı sülhün əldə edilməsində maraqlıdır və siyasətini də bu istiqamətdə yürüdür. Ermənistan tərəfi isə hələ də tarixin son acı dərslərindən nəticə çıxarmaq niyyətində deyil. Ermənistan bilməlidir ki, tarixin acı dərslərindən nəticə çıxara bilməyənləri ondan daha pis aqibət gözləyir. Ermənistan tərəfi, erməni lobbisi və onun havadarları bunu qulaqlarında sırğa etsə daha yaxşı olar", - Kamran Bayramov qeyd edib.

Mürtəza
Ölkə.Az