BRİCS əməkdaşlıq Azərbaycanın mövqelərini daha da gücləndirəcək - Açıqlama

Azərbaycan  yerləşdiyi bölgəyə  və milli maraqlarına uyğun  olaraq  xarici siyasətini müəyyənləşdirərək həyata keçirməkdədir. Bu da  multilateralizm prinsipinə əsaslanan çoxtərəfli diplomatiyadır. Ona görə də Azərbaycan beynəlxalq və regional təşkilatlarla əməkdaşlığını da bu prinsiplər əsasında qurur. Bir sözlər istənilən təşkilata münasibət­də Azərbaycan ön sıraya ölkənin milli və dövləti maraqlarını ortaya qoyur. Əgər  həmin təşkilatla əməkdaşlıq ölkəmizin xarici siyasətinin prioritetlərinə uyğundursa  həmin təşkilatın işində  fəal iştirak edib, öz töhfəsini verir. BRİCS-lə əməkdaşlıq Azərbaycanın maraqlarına cavab verdiyindən təşkilatın işində yaxından iştirak etməyə qərar verib".

 Bunu Ölkə.Az-a açıqlamasında deputat Eyvaz Qurbanov deyib.

Deputat bildirib ki, Azərbaycan beynəlxalq və regional təşkilatlarla  əməkdaşlıq edərkən qarşılıqlı faydalı əməkdaşlığa üstünlük verir. "Bu isə o deməkdir ki, Azərbaycan üzv olduğu regional təşkilatlarda konkret və real proqramlar üzrə işləyir. BRİCS-lə əməkdaşlıq da qarşılıqlı fayda verən əlaqələrin yaradılması baxımdan mühüm rol oynayır. Çünki təşkilat üzv dövlətlərin əksəriyyəti ilə Azərbaycanın sıx  ikitərəfli və çoxtərəfli formaltlarda əməkdaşlıqları mövcuddur", - o qeyd edib.

Deputat  əlavə edib ki, Azərbaycan bu gün təkcə Avrasiya coğrafiyasında deyil, eyni zamanda qlobal miqyasda ciddi aktor rolunda çıxış etməkdədir: "Azərbaycan  bu gün enerji sahəsində deyil, həmçinin  Qərblə Şərqi, Şimalla Cənubu birləşdirən logistik bir qovşaq rolunu oynamaqdadır. Azərbaycan eyni zamanda qlobal iqlim dəyişikliyinə qarşı mübarizədə  Qlobal Şimalla Qlobal Cənub  arasında aktiv dialoq aparmaqdadır. Növbəti mərhələdə isə  Azərbaycan  "yaşıl iqtisadiyyat" və "yaşıl enerji" məsələsində də Qlobal Şimalla Qlobal Cənub arasında ciddi qovşaq rolunu oynamaqla  qlobal iqlim probleminə öz töhfəsini verməyə hazırlaşır. Azərbaycanın  COP29-a ev sahibliyi   və sədrlik etməsi də bu məqsədə xidmət edir.   Qlobal iqlim dəyişikliyinə qarşı mübarizə isə ancaq və ancaq dünya ölkələri ilə multilateralizm prinsipini əsaslanan çoxtərəfli diplomatiyanı həyata keçirməklə mümkündür. Əgər belə bir əməkdaşlıq formatı təmin edilməzsə bu sahədəki qlobal problemin həlli qeyri-mümkündür.  Azərbaycan  BRİCS-in işində yaxından iştirak etməklə  ikitərəfli, çoxtərəfli əməkdaşlıq prinsiplərinə əsaslanaraq  həm ölkələrimiz arasında əlaqələrin yaradılmasına, həm də  toplantıda iştirak edən ölkələrlə COP29-un işində aktiv iştirak etməsi və qlobal iqlim dəyişikliyinə qarşı birgə töhfənin verməsi istiqamətində dialoq aparılır və əməkdaşlıq həyata keçirilir.  Cənab Prezident İlham Əliyevin yürütdüyü   uğurlu çoxtərəfli diplomatiya  nəticəsində BRİCS-lə əməkdaşlıq zamanı  Azərbaycanın   beynəlxalq münasibətlərə sistemində daha ciddi oyunçu rolunda çıxış etməsinə və nəticə etibarı ilə ölkəmizin güclənməsinə, qüdrətlənməsinə öz töhfəsini verəcək".

Mürtəza
Ölkə.Az