Milli Məclisdə qaz limiti, köklü qərar və pul ayrılması təklifləri

Milli Məclisin bu gün keçirilən plenar iclasında 2025-ci il büdcəsinin müzakirəsi davam edir.

Ölkə.Az xəbər verir ki, büdcə zərfinin müzakirəsi zamanı çıxış edən deputatlar əsasən təmsil etdiyi seçicilərin problmelərinin hökumət qarşısında qaldıraraq həllini təklif edirlər.

Milli Məclisin Elm və təhsil komitəsinin sədri Anar İsgəndərov əsasən dağ rayonlarında şagirdlərin azaldığından narahatlığını dilə gətirib. “Ailələr müxtəlif səbəblərdən kəndləri tərk edir və bu səbəbdən də hər il dağ rayonlarında şagirdlər azalmaqdadır. Bu, narahatedici məqamdır. Ona görə də bu məsələ ilə əlaqəli köklü qərar verməyə ehtiyac var”, - komitə sədri qeyd edib.

Deputat İlham Məmmədov isə Yevlax sakinlərinin üzləşdiyi problemlərin həlli istiqamətində addımlar atılmasını hökumət qarşısında qaldırıb. “Bunlardan birincisi və uzun illərdir davam edən ən ciddi problem Yevlax şəhərinin ən gözəl yaşayış massivlərinin yolsuzluq nəticəsində bərbad vəziyyətə düşməsidir. Həmin yaşayış massivlərinə insanların rahat hərəkətini təmin etmək məqsədilə 20-25 metrlik piyada və avtomobil tunelinin çəkilməsidir. Yolsuzluq nəticəsində insanlar 10 km-dən artıq əlavə yolu qət etməklə ən kiçik işi üçün şəhərə gəlir. Bu o qədər də maliyyə vəsaiti tələb etmir.

Digər problem isə Yevlax şəhərinin 8 mindən artıq insanın yaşadığı Aeroport, Çənlibel, Şəkərcik yaşayış massivinə gedən yolla bağlıdır. Adıçəkilən yaşayış massivləri ilə Yevlax şəhəri arasında dəmir yol xətti keçir və insanların rahat keçidini təmin etmək üçün dəmiryolu üzərində şlaqbaun xətti var idi. Amma uzun illərdir həmin şlaqbaun keçidi ləğv edilib və bu da insanlara ciddi problem yaradır. Bu insanların təkcə əlavə vaxt və maliyyə itkisinə səbəb olmur, eyni zamanda yolu keçərkən həyatlarını ciddi təhlükə qarşısında qoyur. Hökumətdən bu problemlərin həllinə yardımçı olmasını istəyirik”.

Monopolistlərin yerli istehsala ciddi maneə yaratdığını deyən Məsimli bildirib ki, müxtəlif vasitələrdən istifadə edərək rəqiblərini sıradan çıxarırlar: “Bu istiqamətdə digər ciddi məsələ isə monopolistlərin bəzi sahələri çıxmaqla gəlirli sahələrə əl qoymalarıdır”.

Məsimli eyni zamanda bölgələrin qazlaşdırılmasını, qaz limitinin isə tədricən aradan qaldırılmasını hökumətə təklif edib.

Deputat Azər Badamov da Qusarın qazlaşdırılmasını və həmçinin “Bənövşə gölü” su anbarının bərpası məsələsini hökumət qarşısında qaldırılıb. “Qusar şəhərinin yanındakı “Bənövşə gölü” su anbarı Qusar şəhəri və ətraf kəndlərini uzun illər içməli və təsərrüfat suyu ilə təmin edib. Amma son illər baxımsız qalıb və qurudularaq yararsız hala gətirilib. Dünyada baş verən iqlim dəyişiklikləri şirin su mənbələrinin azalmasına gətirib çıxarır. Bu baxımdan su anbarlarının tikilməsi və bərpası çox aktual məsələdir. Bütün bunları nəzərə alaraq müvafiq qurumdan Qusar şəhərinin yanında yerləşən “Bənövşə gölü” su anbarının bərpasını diqqətdə saxlanılmasını xahiş edirəm”, - deyə deputat bildirib.

Deputat Soltan Məmmədov ilk olaraq icbari tibbi sığorta sisteminin tətbiqi və son illərdə xidmətlər zərfinə daxil olan tibbi müdaxilələrin sayının artırılmasını təqdir edərək, bunu müsbət addım hesab etməklə yanaşı, bir sıra prioritet səhiyyə məsələlərinin həlli üçün dövlət proqramlarının gələcəkdə icbari tibbi sığorta çərçivəsində xidmətlər zərfinə daxil edilməsi daha məqsədəuyğun hesab edib.

Mürtəza
Ölkə.Az