AXCP mətbuat katibi: "Biz də kimlərləsə birləşmək üçün əldən-ayaqdan getmirik"

“Ellada Məmmədli əgər Razi Nurullayevin açıqlamasını oxusaydı, belə intriqa yaradacaq fikirlər səsləndirməzdi”

Bunu Ölkə.Az-a açıqlamasında AXCP-nin mətbuat katibi Vüsal Qarayev Azərbaycan Demokratiya və Rifah Hərəkatının (ADR) təşkilat komitəsinin üzvü Ellada Məmmədlinin mətbuata dediyi “Bizim hansısa quruma birləşməyimiz qeyri-ciddi məsələdir. Razi bəy bunu düşünmədən deyib” fikirlərinə münasibət bildirərkən vurğulayıb.

Mətbuat katibi bildirib ki, Razi Nurullayev, ümumiyyətlə Qubad İbadoğlunun rəhbərlik etdiyi hərəkatın sədrlik etdiyi AXCP-yə birləşə biləcəyi ilə bağlı fikir səsləndirməyib:

“Sadəcə olaraq jurnalist Ellada xanımı yönləndirib. Xanım isə Razi bəyin açıqlamasını oxumadığı üçün belə xoşagəlməz fikirlər səsləndirib, yanlış istiqamətə yönəlib. Əgər oxusa görərdi ki, Razi Nurullayev jurnalistin sualına cavab olaraq deyib ki, hal-hazırda gündəmdə belə məsələ yoxdur. Partiyaya belə bir istək daxil olmayıb. Əgər belə müraciət olacaqsa və xalqın maraqları bunu tələb edəcəksə, AXCP ilə Qubad İbadoğlunun təşkilatının birləşməsi müzakirə mövzusu ola bilər. Razi Nurullayev Ellada Məmmədlinin dediyinin tam əksinə, məhz düşünərək, xalqın mənafeyindən çıxış edərək fikir bildirib”.

V. Qarayev ADR-in sədr müavini Vurğun Əyyubun, “ADR heç bir siyasi təşkilatla birləşmək niyyətində deyil” fikirlərinə də münasibət bidiririb:

“Öncədən də dediyim kimi, bu anlaşılmazlıq qarşı tərəfin anlaşılmazlığından yarandı. Heç biz də kimlərləsə birləşmək üçün əldən-ayaqdan getmirik. Sadəcə Razi Nurullayev bildirib ki, əgər bizə belə bir təklif gələrsə, müzakirə etmək olar. AXCP sədr Razi Nurullayevin və onun ətrafına toplanan fədakar cəbhəçilərin səyləri nəticəsində getdikcə keçmiş nüfuzunu geri qaytarmaqda, müxalifətdə aparıcı güclərdən birinə, hətta birincisinə çevrilməkdədir. Kimlərəsə bizimlə birləşmək maraqlı olmalıdır və bu belə də olacaq”.

V. Qarayev sonda “Biz hörmətli jurnalistləri daha dəqiq və deyilən ifadəni təhrif etmədən dərc etməyə dəvət edirik” deyə əlavə edib.

Ölkə.Az