Azərbaycanda İŞİD təhlükəsi varmı?

"Belə bir xüsusi xidmət orqanları millətin qayğısına qala bilərmi?"

Heç bir dövlət terrordan sığortalanmayıb. Dünya hal-hazırda terrorla mübarizə aparır. Azərbaycan terrora dəfələrlə məruz qalan bir ölkədir. Bizi İŞİD təhlükəsi gözləyirmi? Xüsusi xidmət orqanları terrorizmə qarşı necə mübarizə aparır? Terrorizmdən necə xilas almaq olar?

Bu suallara politoloq Zərdüşt Əlizadə Ölkə.Az-da cavab verib:

"Azərbaycanda hələlik İŞİD təhlükəsi çox deyil. Əgər vəziyyət belə davam edərsə 5-10 ilə radikal islamçılar ölkəni ələ keçirə bilər. Bu bütövlükdə millət üçün böyük təhlükədir. İnsanların dini radikalizmə meyillənməsinin əsas səbəbi odur ki, yaşadıqları həyatda gerçək ədalət görmürlər. Ədalət olmayanda insan ədaləti arzulayır və o zaman başlayır onu başqa şeylərdə axtarmağa. Bəziləri kommunizmdə, bəziləri liberalizmdə, bəziləri isə ədaləti dində axtarır. Radikal islamçıların fikrincə bəşəriyyətin qızıl dövrü Məhəmməd peyğəmbərin və xəlifələrin dövründə olub. Həmin dövrə qayıtmaq üçün bütün dini ayinləri yerinə yetirmək və dindən başqa heç bir şeyə inanmırlar.

Bizim cəmiyyət əgər istəyirsə ki, dini radikalizmin təməli olmasın, onda çalışıb Azərbaycan konstitusiyasının bəndlərinə riayət etməlidir. Son bir aydır ki, bütün xalqımıza nümayiş etdirildi ki, bizim təhlükəsizlik xidmətimiz nə ilə məşğul olub. Təhlükəsizlik xidmətimiz reketlik, oğurluq, dinləmələr və qatillik edib. Belə bir xüsusi xidmət orqanları millətin qayğısına qala bilərmi?

Terrorizm bizə ona görə dəymir ki, bizdən daha vacib məqsədlər var. O məqsədlərlə məşğuldurlar. O məqsədlərə çatandan sonra ola bilsin ki, Azərbaycanın da növbəsi çatacaq. Azərbaycan qurdlar ovlağında quzu kimi şikardır. Onu ovlamaq o qədər də çətin deyil".

Səxavət Məmməd
Ölkə.Az