Sərdar Cəlaloğlu: SSRİ-nin dağılmasının Qorbaçova heç bir aidiyyatı yoxdur

Mixail Qorbaçov bir çoxlarının gözündə SSRİ-ni dağıdan adam kimi qalıb. Hətta bəziləri iddia edir ki, onun apardığı aşkarlıq siyasəti nəticəsində müstəqil respublikalar yaranıb.

Bu iddialara ADP sədri Sərdar Cəlaloğlu Ölkə.Az-da aydınlıq gətirib:

"Sovet hökumətinin dağılmasında Qorbaçovun heç bir rolu olmayıb. Ruslar başa düşməlidir ki, Qorbaçov rusların başına gələcək çox ağır faciəni çox yüngül nəticə ilə aradan çıxardı. Rusiyadan əvvəl dünyaya ağalıq edən neçə-neçə imperiyalar məhv olmuşdu. SSRİ sonuncu imperiya idi və dağılacaqdı. SSRİ-də 70-ci illərdə ərzaq talonla idi. Ərzaq çatışmazlığı var idi. Sovet hökuməti gördü ki, vəziyyətdən çıxa bilmir, Əfqanıstana hücum etdi. Əfqanıstanı talayıb gətirdilər. Əfqanıstan müharibəsindən sonra təzədən böhran başladı.

Qorbaçov hakimiyyətə gələndə islahatlar həyata keçirməyə başladı. Qorbaçov rus imperiyasının ən alovlu tərəfdarlarından biri idi. Rus imperiyasının saxlanmasının tərəfdarı idi. Yetsinlə Qorbaçovun mübahisəsi elə onun üstündə idi. Qorbaçov SSRİ-nin dağılmasını heç istəmirdi. Məmmədəmin Rəsulzadə demişdi ki, SSRİ iqtisadi islahatlar keçirməyə məcburdur, həmin vaxt da milli hisslər qalxacaq və SSRİ dağılacaq.

Məmmədəmin Rəsulzadənin əsərlərində də var ki, sovet hökuməti 70 ildən artıq yaşaya bilməz. SSRİ-nin dağılacağı 70 il əvvəldən deyilib. SSRİ-nin dağılmasının Qorbaçova heç bir aidiyyatı yoxdur. Bunu iddia edənlər qəsdlə sovetlərin dağılmasını Qorbaçovun üstünə atıb, yenidən rus imperiyasını bərpa etməyə cəhd edirlər. Qorbaçovun ruslar üçün ən böyük xidməti ondan ibarət idi ki, rus imperiyasının tamamilə dağılmasına imkan vermədi".

Səxavət Məmməd
Ölkə.Az