"Bütün dünyanın gözü önündə türkmənlər soyqırıma uğradılır"

"Bölgədə nə baş verir versin, əsas ziyan çəkən türkmənlərdir"

Misirdə Rusiya təyyarəsi düşürüldü, ardından Fransada terror aktları törədildi və bütün dünya buna görə ayağa qalxdı, ancaq türkmənlərə qarşı soyqırım edilir nəinki dünya, heç türk respublikaları belə reaksiya vermir. Yalnız bu gün Türkiyə BMT Təhlükəsizlik Şurasına müraciət edərək üzv ölkələri təcili olaraq Rusiya hava-kosmik qüvvələrinin zərbələrinə məruz qalan Suriyanın şimalında Bayırbucaq rayonunda yaşayan türkmənlərin məsələsinə baxmağa çağırıb.

İraqın Kərkük bölgəsində, eləcə də Suriyanın Türkiyə ilə sərhəd bölgəsində rəsmi rəqəmlərə görə 5 milyon, əslində isə 10 milyona yaxın türkmən yaşayır. İraqda türkmənlərin 2 milyonundan çoxu Səddam Hüseyin dönəmində ərəblər yaşayan bölgələrə köçürülərək assimilyasiyaya məruz qalıblar və öz kimliklərindən demək olar ki, məhrum ediliblər. Hal-hazırda İraqda rəsmi rəqəmlərə görə 3 milyon, Suriyada isə 2 milyon türkmən yaşayır. Türkmənlər kompakt halında Türkmən dağı deyilən bölgədə, dağın vadisində və dağın özündə məskunlaşıblar. Onlar orada kənd təsərüffatı ilə məşğul olurlar. Suriyada müharibə başlayanda türkmənlər neytrallığa üstünlük verdilər. Türkmənlər Azərbaycan kökənlidirlər. İraqın Hələb bölgəsində yaşayan türkmənlərin hamısı Azərbaycandan gedən türk tayfalarıdır. Unutmamalıyıq ki, məşhur Azərbaycan şairi, filosofu, mütəfəkkiri İmadəddin Nəsiminin qəbri də məhz Suriyanın Hələb şəhərindədir.

Azərbaycan arialı Ağqoyunlu, Qaraqoyunlu, Səfəvilər dövründə İraqın Hələb şəhərinə qədər idi. O zaman Azərbaycanın sərhədləri 2.750.00 kvadrat kilometrdən çox idi. Həmin əraziləri Azərbaycan itirə-itirə gedib. Azərbaycanda yaşayan türklərə qondarma azərbaycanlı adı verildiyi kimi, sonradan orada yaşayan türkdilli tayfalara da də türkmən adı verdilər. Türkmən sözü Türkə bənzər deməkdir. Türkmənlərin dili türk dilidir. Onların dili bizə çox yaxındır.

Suriyada türkmənlərə qarşı edilən soyqırım siyasətini politoloq Qabil Hüseynli Ölkə.Az-da şərh edib:

"ABŞ İraqa hücum edərkən Türkiyənin bir səhvi ucbatından Kərkükü əldə edə bilmədi. ABŞ Türkiyəyə söz vermişdi ki, İraq müharibəsi sona çatanda tarixi ərazilərinizi, Kərkük vilayətini və digər əraziləri özünüzə qaytaracağıq. 2003-cü ildə Türkiyənin parlamenti çox səhv qərar verdi. Türkiyə ərazisinə daxil olan ABŞ qoşunları çıxarıldı. ABŞ Səddam rejiminə qarşı şimaldan hərbi əməliyyatlara başlamaq istəyirdi. Bunun müqabilində də Türkiyəyə böyük uduşlar vəd edirdi. Təəssüf ki, dindar və kürd əsilli deputatların qərarları sayəsində bu baş tutmadı.

Türkiyə türkmənlərdən təxminən 5 min nəfərlik nizami ordu hissəsi yaratdı. Həmin ordu kifayət qədər döyüş qüdrətinə malik idi. Onlar hətta İŞİD-dən bəzi əraziləri azad edə biliblər. Türkiyənin hazırladığı türkmən əsgərləri İŞİD-i sıxışdırmağa başlayanda Bəşər Əsədin göstərişi ilə və eyni zamanda Rusiyaya verdiyi kəşfiyyat materialları əsasında türkmənlərin bölgəsi bombardıman edilməyə başlandı. Artıq bir neçə gündür ki, türkmənlərin yaşadığı ərazilər bombardıman edilir. Türkmən dağı boyu yerlşən kəndlərin hamısı yerlə-yeksan edilir. Rusiya gah Aralıq dənizindən, gah da Xəzər dənizindən Suriyadakı İŞİD mövqelərinə qanadlı raketlər atır, ancaq bu raketlər gah Suriya Azadlıq Ordusunun mövqelərinə, gah da türkmənlərin yaşadığı bölgəyə düşür. Hazırda türkmən xalqına qarşı sözün əsl mənasında soyqırım siyasəti həyata keçirilir. Bəşər Əsəd də öz xalqına qarşı bu cinayəti törətmiş bir adamdır. Rusiya əli qana batmış birini müdafiə etməklə, orada azlıqda qalan xalqların üzərinə hücum etmiş olur.

Türkiyə bu işə gec də olsa reaksiya verdi. Türkiyənin Millətçi Hərətkət Partiyasının sədri Dövlət Bahçeli televiziya ilə çıxışında açıq surətdə həm ölkədəki siyasi rəhbərliyi, həm də BMT-ni qınadı. Dövlət Bahçeli bildirdi ki, belə bir cinayətə reaksiya verməmək əslində cinayətkarla əlbir olmaq deməkdir. Bundan sonra Türkiyənin Xarici İşlər Nazirliyi də hərəkətə gəldi. Əvvəlcə Rusiyaya nota verildi, indi isə Rusiyanın hərəkətlərindən BMT-yə şikayət etdilər.

Rusiya bölgəni tamamilə bir-birinə qatıb. Bu bölgədə rusların güddüyü siyasi məqsədi çətin də olsa müəyyən etmək mümkündür. Ancaq bölgəni bu qədər qatıb-qarışdırmaqları çox təəccüblüdür. Suriya darmadağın edilir. Suriyadan miqrant axını sürətlənir. Suriyanın qonşu dövlətlərlə münasibəti daha da pisləşdirilir. Rusiya sanki özünün bir bataqlığa düşdüyünü anlayır, eyni zamanda arxasını yerə verməyərək davam edir. Belə qarşıdurmadan üçüncü dünya müharibəsi qoxusu gəlir. Çünki, Fransa buradakı qoşunlarının sayını 3 dəfə artıracaq. Böyük Britaniya da bu bölgəyə desant qüvvələri və digər hərbi birləşmələr göndərəcəyini elan edib. Dünən isə ABŞ prezidenti Barak Obama birmənalı şəkildə elan etdi ki, İŞİD məğlub ediləcək, Bəşər Əsəd isə hakimiyyətdən uzaqlaşdırılacaq. Bölgə demək olar ki, tamamilə hərbiləşdirilib".

Türkmənlərə qarşı aparılan soyqırım siyasətinə dünyanın səssiz qalmasına isə politoloq belə cavab verib:

"Bölgədə nə baş verir versin, əsas ziyan çəkən türkmənlərdir. İraqdakı türkmənləri kürdlər qırır, Kərkük şəhərinin çox hissəsinə kürdlər nəzarət edir. Bölgədə türkmənlərə qarşı soyqırım siyasəti aparılır. BMT bu məsələyə tamamilə biganə qərarsız münasibət bəsləyib. Rusiyanın təyyarəsi qəzaya uğrayanda buna qarşı böyük bir reaksiya oldu, Fransada terror aktı törədiləndə bütün dünya sərt reaksiya verdi. Ancaq hal-hazırda bütöv bir xalqı yox etməyi qarşısına məqsəd qoymuş Bəşər Əsəd rejiminin, kürd qruplarının cinayətlərinə hamı göz yumur. Türk dünyası da bu məsələyə susqundur. Türk dünyası deyəndə Rusiyada 10-dan çox muxtar qurum var, 6 müstəqil türk dövləti var, Bosniya və Hersoqaveniyada türklərin qurumları var, Makedoniyada türk muxtariyyəti var, bunları sayanda 20-ə yaxın rəqəm alınır, ancaq bunların heç biri türkmənlərin soyqırımına reaksiya vermir".

Səxavət Məmməd
Ölkə.Az