"Hal-hazırda türkmənləri İran və Rusiya qırır, Qərb isə susur"

"Rusiya və İranın türkmənləri qırmaqda məqsədi həm Türkiyənin nüfuzunu zərbə altında qoymaqdır, həm də türkmənləri oradan sıxışdırıb çıxarmaqdır"

Bir neçə gündür Suriyanın şimalında türkmənlərə qarşı soyqırım həyata keçirilir. Avropa və Qərbin digər ölkələrində terror aktları baş verən zaman bütün dünya ayağa qalxsa da, türkmənlərə qarşı törədilən soyqırımda dünya izləyici qalmaqdadır. BMT də baş verən soyqırıma reaksiya vermir. Bunları haradasa anlamaq olar, ancaq türkdilli ölkələrin baş verən soyqırımı səssiz tamaşa etməsi düşündürücüdür.

Suriyada türkmənlərə qarşı törədilən soyqırıma "Oğuz" Müstəqil Araşdırmaçılar Qrupunun rəhbəri Vüqar Zifəroğlu Ölkə.Az-da münasibət bildirib:

"Türkmən faktorunun orada olması nə Əsəd iqtidarının, nə də İran-Rusiya cütlüyünün maraqlarına cavab vermir. Türkmənlərin varlığı Türkiyənin bölgədə mövcudluğunu təsdiq edən amildir. Qərbin özünə gəldikdə isə onlar İraqda və Suriyada, Kobani hadisələri zaman da kürdləri özlərinə müttəfiq görürdülər. Bu baxımdan Qərb ölkələrinin türkmən qətliamına susması təbii bir şeydir. Türk cümhuriyyətləri bu məsələyə adekvat bir cavab verməlidir. Ən azı diplomatik formada buna etiraz etməyə borcluyuq. Türkmənlərin həm İraqın şimalında, həm Suriyanın şimalında varlığı əslində bizim dövlət və milli maraqlarımıza xidmət edir. Hal-hazırda İran və Rusiya müştərək bir şəkildə bu varlığın izini silməklə məşğuldurlar.

Rusiyanın endirdiyi hava zərbələri, Əsəd qüvvələrinin və eyni zamanda İranın Sepah birləşmələrinin hücumu nəticəsində türkmənlərin böyük əksəriyyəti qətliamla üz-üzə qalıb. Bu mənada biz buna öz etirazımızı bildirməliyik. Proseslərin bu axarda gedəcəyi aydın idi. Rusiya təkcə İŞİD-i deyil, Bəşər Əsədə qarşı olan bütün qüvvələri hədəf kimi götürüb. Suriyada İŞİD-ə qarşı və kürdlərə qarşı döyüşlərdə türkmənlər basqı altında idilər. Müharibə başlayan zaman hədəfdə ilk növbədə elə türkmənlər idi. Kobanidə baş verən hadisələr zamanı Qərb bildirirdi ki, kürdlərə dəhliz açsın. Türkiyənin gətirdiyi arqument o oldu ki, İŞİD türkmənləri qıran zaman Qərb niyə reaksiya vermirdi? Türkmənlər əvvəldən hədəf idi. Sonrakı proseslərdə Türkiyənin balanslaşdırılmış siyasəti müəyyən mənada türkmənləri hədəfdən uzaqlaşdırdı. Hal-hazırda türkmənlər Rusiya və İranın hədəfindədir. İraqda da türkmənlər kürdlər tərəfindən soyqırıma uğradılır. Mosulda, Kərkükdə, Tikritdə, Ərbildə türkmənləri qırdılar. Bu soyqırım indi Suriyanın şimalında da davam edir.

Əvvəllər türkmənlərə qarşı qırğını kürdlər Qərbin dəstəyi ilə törədirdilər. İndi isə türkmənləri İran və Rusiya qırır, Qərb isə susur. Türkmən faktoru Suriyanın şimalında çox ciddi faktordur. Türkmən faktorunun Suriyada olması İŞİD-lə mübarizədə özünü göstərirdi. Rusiya və İranın türkmənləri qırmaqda məqsədi həm Türkiyənin nüfuzunu zərbə altında qoymaqdır, həm də türkmənləri oradan sıxışdırıb çıxarmaqdır".

Səxavət Məmməd
Ölkə.Az