"Bu məsələdə Türkiyə haqlıdır və Rusiya heç nə edə bilməz"

"Bu məsələnin bizə heç bir aidiyyatı yoxdur. Azərbaycan indiki halda dərindən nəfəs alıb yerində rahat oturmalıdır".

Bu fikirləri Ölkə.az-a açıqlamasında Türkiyə-Suriya sərhədində Rusiyaya məxsus Su-24 tipli qırıcı təyyarəsinin vurulmasına münasibət bildirən politoloq Zərdüşt Əlizadə səsləndirib. Z.Əlizadə ötən il Azərbaycan hərbçilərinin erməni hərbi helikopterini vurmasına da diqqət çəkib:

"Ötən il Azərbaycan hava sərhədimizi pozan erməni hərbi helikopterini vurmuşdu və yaxşı da etmişdi. Bizim ərazimizə girməsin. İndi də Rusiya təyyarəsi Türkiyənin hava sərhədini pozub və bu ikinci dəfə baş verib. Birinci dəfə xəbərdarlıq ediblər. İndiki halda Türkiyə haqlıdır və Rusiya heç nə edə bilməz. Ermənistan bizə nə elədi ki, Rusiya da Türkiyəyə nəsə eləsin? Burada pis olan odur ki, Rusiya Suriyada öz çirkin oyununu aparır və ortada qırılan insanlar, dağıdılan dövlət, tarixi abidələr var".

Xatırladaq ki, Türkiyə Silahlı Qüvvələrinin Baş Qərargahı təyyarənin ölkənin hava sərhədlərini pozduğuna görə hava hücumundan müdafiə qüvvələri tərəfindən vurulduğu barədə açıqlama yayıb.

İntiqam VALEHOĞLU
Ölkə.az