\"AXCP kimsənin atasının malı deyil\"

"Hörmətli ekspert şou yaratmaq, gündəmə gəlmək və ya özün Əli Kərimliyə şirin satmaq üçünmü belə açıqlama verib deyə bilmirəm. Amma Azər bəy nahaq rahat şəkildə Azərbaycan ictimaiyyəti adından danışmaq haqqının olduğunu düşünür".

Bu sözləri, siyasi şərhçi Azər Rəşidoğlunun açıqlamasına cavab verən, Azərbaycan Xalq Cəbhəsi Partiyasının mətbuat katibi Vüsal Qarayev deyib. Mətbuat katibi A. Rəşidoğlunun fikirlərinin qərəzli olduğunu bildirib:

"Onun xalqın adından bizim əleyhimizə danışması, düşünürəm ki, fikirlərində nə qədər qərəzli olduğunu göstərir. İctimai rəyin illərdir uçuruma sürüklənən, müxtəlif çirkli oyunlarla nüfuzu sfıra endirilən Əbülfəz Elçibəydən sonrakı AXCP haqqında fikirləri hərkəsə məlumdur. AXCP kimsənin atasının malı deyil. Bu partiya xalqındır, Əbülfəz Elçibəydən sonra isə partiya rəhbərliyi xalq üçün heç nə etmədi. İmkan verin insanlar kimin yanında olacaqlarına özləri qərar versin. Bizim məqsədimiz AXCP-ni şəxsi mülkiyyətdən çıxarıb, yenidən xalqın partiyası etməkdir. O ki, qaldı Azər Rəşidoğlunun başqa ad seçmək təklifinə, biz istəsək bunu çoxdan edərdik, lakin bizim məqsədimiz bir daha vurğulayıram yeni partiya yaradıb siyasi arenaya gəlmək, şou yaratmaq yox, Əbülfəz Elçibəy ruhunun var olduğu AXCP-ni öz həqiqi sahiblərinə, xalqa qaytarmaqdır".

Mətbuat katibi millət vəkili Fazil Mustafanın da AXCP haqqında fikirlərinə münasibət bildirib.

"Fazil Musatafanın “Artıq o missiyasız, ölmüş bir partiyadır” fikirləri ilə razılaşmamaq mümkün deyil. Bəli, illərdir AXCP-ni öz çirkin əməllərinə alət edənlər partiyanı yavaş-yavaş öldürdülər, heç bir missiyası olmayan özəl bir quruma çevirdilər. Və həmçinin bu gün Azərbaycanda hansı müxalif partiya qarşısına missiya qoyub, o missiya uğrunda geniş fəaliyyət göstərir? Bax bu suala cavab vermək çətindir, çünki cavabı yoxdur. Dəyərli millət vəkilimiz bu qədər pessimist olmasın. Biz AXCP-ni yeni formatda şəkilləndirib, günümüzün, cəmiyyətimizin və beynəlxalq sivil tələblərə uyğun şəkildə təqdim etməyə çalışacağıq. Hələ hərşey bitməyib", deyə Vüsal Qarayev qeyd edib.

Ölkə.Az