AXCP-nin məhkəməsinin vaxtı açıqlandı

Ədliyyə Nazirliyi AXCP-nin qurultayla bağlı sənədlərini məhkəmə predmeti kimi qiymətləndirərək geri qaytardıqdan sonra, partiyanın qeydiyyat məsələsinin həlli ilə bağlı məhkəməyə olunan müraciətinə baxılmasının vaxtı müəyyən edilib.

Belə ki, müraciətə dekabrın 28-də 1 saylı Bakı İnzibati-İqtisadi Məhkəməsində baxılacaq. Məhkəmə hakim Tahirə Əsədovanın sədirliyi ilə keçiriləcək. Bu barədə AXCP-nin sədr müavini, məhkəmədə partiyanın müdafiə edəcək hüquqşünas Mehman Muradlı məlumat verib.

Mehman Muradlı bildirib ki, prosesin sürətlənməsi üçün məhkəməyə müraciət etməli olublar: “Əgər biz məhkəməyə müraciət etməsəydik proses uzanacaqdı və bu da bizim işimizə bəzi manelər yaradacaqdı.

Məhkəmə çəkişməsinə gəlincə hesab edirəm ki, qarşı tərəf bu işi uzatmaq istəyəcək və möhürü əllərində saxlamağa çalışacaq. Biz məhkəməyə müraciətimizi qanunvericiliyin tələbi ilə əsaslandırılmış formada hazırlamışıq. Bu səbəbdən məhkəmə çəkişməsi bizim xeyrimizə həll olunacaq və AXCP adından çıxış etmək səlahiyyəti həm də qanuni baxımdan bizdə olacaq”.

Ölkə.Az