Rusiya bütün türk dünyasına qarşı qəzəblidir

"Hər halda o təyyarə dinc türkmənlərə yardım üçün səmaya qalxmamışdı..."

Son günlər cəhbə xəttində gərginlik artıb. Rusiya Ermənistana yeni helikopterlər göndərib. Bu isə Azərbaycan tərəfini narahat etmiyə bilməz.

Yaranan vəziyyəti hərbi ekspert İbrahim Rüstəmli Ölkə.Az-a şərh edib:

"Rusiya bütün türk dünyasına qarşı qəzəblidir. Bu qəzəb genetik xarakterilə fərqlənir və uzun müddətdir rəsmi Kremli bu və digər şəkildə müşaiyət edir. Əgər xatırlayırsınızsa, bu günlərdə Kremlin danışan dili tanınmış sosioloq və politoloq Aleksandr Duqin Azərbaycanı və Türkiyəni hədələdi.

"Əks halda bu, hamı üçün pis olacaq. Heç kim situasiyadan birtərəfli qaydada faydalanıb özünün regiondakı strateji mövqeyini yaxşılaşdıra bilməyəcək. Bu konflikt heç kimə lazım deyil, ona görə ki, ondan yararlanıb müsbət nəticələr əldə eləmək mümkünsüzdür. Mən vəziyyətin mürəkkəbliyini və münaqişə tərəflərinin narazılığını başa düşürəm, ancaq Qarabağda status-kvonu dəyişməyə edilən istənilən hərbi cəhd regionda vəziyyəti yalnız daha da ağırlaşdıracaq və yeni qanlara gətirəcək, özü də heç bir yekun nəticə olmadan.

Göründüyü kimi, bu gün dünya insani prinsipləri tanımayan dəhşətli və amansız mövqe savaşlarının qanlı səhnəsinə çevrilib. Bu səhnədə artıq qaydasız döyüş gedir. Hegemon ölkələr tərəfindən uzun müddət işlənib-hazırlanmış, ölçülüb-biçilmiş ənənəvi dövlət siyasətindən daha çox, prezidentlərin fərdi mövqeyi ifadə olunur. Elə ona görə də biz bu səhnədə özümüzü, məsələn, Putin Obama qarşıdurmasının, əlbəyaxa "döyüşünün" tamaşaçısı qismində görürük.
Belə bir vaxtda qardaş Türkiyə Cümhuriyyətinin prinsipial mövqe sərgiləməsi isə kifayət qədər kövrək notlarla yadda qalır. Çünki Türkiyə bitib-tükənməyən iç problemlərinə baxmayaraq, dinc insanların, qanı bir, dili bir türkmən xalqının yeganə müdafiəçisi, himayədarı və nəhayət, yiyəsi qismində döyüşə atılıb. Burada artıq Ərdoğanın daim çılğın və inadkar siyasi portreti arxa fonda dayanır. Rusiyaya məxsus təyyarənin vurulması isə tamamilə təbii görünür. Hər halda o təyyarə dinc türkmənlərə yardım üçün səmaya qalxmamışdı, əksinə, körpə uşaqların başına bomba yağdırmaq niyyətilə havalanmışdı.

Bütün bunlar, əlbəttə, Rusiya Türkiyə münasibətlərinin kəskin pisləşməsi fonunda baş verir və özünü artıq Dağlıq Qarabağ münaqişəsində də açıq-aydın göstərir. Başqa sözlə, Rusiya yaşanan gərginliyi özünə yaxın və uzaq ətrafa etap edir və bununla söz sahibi olduğuna əminlik yaratmaq niyyətini güdür. Yəni mənim başımın ağrıması, həm də, məsələn, Azərbaycanın başının ağrıması deməkdir. Nəticə isə göz qabağındadır. Deyilənə görə, təmas xəttinə artıq ağır texnikalar cəmlənir. Bununla belə, müharibənin yenidən başlaması ehtimalı inandırıcı deyil. Səslənən bəyanatların hansısa bir formada perspektivinin olacağını və nəticə etibarilə həyata keçəcəyini düşünmürəm. Ona görə ki, atılacaq hansısa qəzəbli addım Rusiyaya həddən artıq baha başa gələ bilər. Bunu rəsmi Kremlin özü də aydın başa düşür”.

Səxavət Məmməd

Ölkə.Az