\"Rusiya ya ABŞ-a qoşulmalıdır, ya da Suriyadan çıxmalıdır\"

Rusiya Türkiyə ilə barışıq üçün şərtlərini açıqlayıb

Rusiyanın Ankaradakı səfiri Andrey Karlov bəyan edib ki, birincisi, təyyarənin vurulması, pilotun ölümü ilə bağlı üzr istənməli, ikincisi, buna məsul olan şəxslərin tapılması və lazım olan cəzaların verilməsi, üçüncüsü isə Rusiyanın üzləşdiyi zərərin ödənilməsi.

"Bu şərtlərimiz yerinə yetirilməsə, Türkiyənin digər açıqlamaları nəticəsiz qalacaq", deyə Rusiya səfiri bildirib.

Türkiyə tərəfi isə dəfələrlə bildirib ki, Rusiyadan üzr istəməyəcək.

Baş verən prosesləri politoloq Qabil Hüseyinli Ölkə.Az-a şərh edib:

"Türkiyə əvvəlcədən söyləyib ki, o heç zaman üzr istəməyəcək. Ona görə ki, rus hərbi təyyarəsi Türkiyənin hava sərhədini pozub və ona görə də vurulub. Türkiyə üzr istəməyəcəksə, demk təzminat da ödəməyəcək. Üstəlik Türkiyə rus hərbi təyyarəsini vuran adam haqqında cəza tədbiri görməyəcək. Rus qırıcısını vuran şəxs vətənpərvərlik göstərib, öz hava sahəsini xarici ölkənin təyyarəsindən qoruyubsa, onu niyə görə cəzalandırmalıdırlar? Rusiyanın hərəkətlərində heç bir dəyişiklik olmayıb. Söhbət kompromisdən gedirsə tərəflərin hər biri müəyyən güzəştlər edə bilər. Misal üçün Türkiyə ölmüş pilotun ailəsi üçün müəyyən təzminat ödəyə bilər, ancaq bütövlükdə təyyarənin pulunu ödəsin, Putindən üzr istəsin, bunlar "tüpürdüyünü yalamaq" deməkdir. Bu haqlı ola-ola başqa millətin qarşısında əyilmək deməkdir. Rusiya bu yolla problemləri həll edə bilməyəcək. Rusiya kompromisə getməyəcəksə, danışıqlar alnmayacaq və ya alınsa belə bu danışıqlarda heç bir uğur əldə olunmayacaq. Rusiyanın bu cür israrlı mövqeyi diplomatiyaya yaraşmır. Diplomatiya mümkün olanı əldə etmək üsuludur.

Artıq İran da Rusiyadan uzaqlaşır. İran Suriyadakı qoşunlarını geri çıxardır. Bu da Rusiyanın zəifləməsi və demək olar ki, meydanda tək qalması deməkdir. Suriyaya ABŞ başda olmaqla ABŞ-ın yaratdığı qüvvələr gəlir. Rusiya ya ABŞ-ın başçılıq etdiyi koalisiyaya qoşulmalıdır, ya da Suriyadan çıxmalıdır. Rusiya üçün çətin günlər bundan sonra başlayacaq".

Qeyd edək ki, Rusiya Türkiyə münasibətləri rus təyyarəsinin Türkiyyə sərhəddini pozmasından sonra pisləşib.

Səxavət Məmməd
Ölkə.Az