\"Prezidentlərin İsveçrə görüşündən sonra Rusiya Qarabağda müharibəni qızışdırmağa başlayıb\"

ABŞ-ın Rusiyanı çökdürmək planı Azərbaycanın da başında çatladı.

Azərbaycanın “Azeri Light” markalı nefti hazırda dünya bazarlarında hökm sürən mürəkkəb situasiyaya görə faktiki olaraq premiyasız, yəni daha ucuz neft markaları ilə eyni qiymətə satılır.

Bu ekspertlər tərəfindən Azərbaycana təzyiq forması kimi qiymətləndirilir. Digər yandan Ermənistan təzyiqlərini artıraraq Azərbaycanı Rusiyaya şikayət edir.

Ölkədə baş verən devalvasiya və xarici qüvvələrin Azərbaycana təzyiqi fonunda rəsmi Bakı hansı addımları atmalıdır və bu fəlakətlərdən maksimum dərəcədə zərərsiz çıxmaq üçün nə etməlidir?

Baş verən son prosesləri politoloq Qabil Hüseynli Ölkə.Az-a verdiyi açıqlamasında şərh edib:

"Azərbaycan nefti dünyanın ən yüksək keyfiyyətli nefti hesab olunur. Əgər Azərbaycan neftini Brent markası ilə deyil, aşağı, keyfiyyətsiz neft kimi dəyərləndirmək istəyirlərsə, bu sırf subyektiv yanaşmadır. Bu yanaşma Azərbaycanı zəiflətmək istəyən dairələrin düşündükləri növbəti siyasi avantüradır. 100 ildən çoxdur ki, Azərbaycan nefti çıxarılır və bu müddət ərzində Azərbaycan nefti “Azeri Light” adı ilə ən yüksək keyfiyyətli neft markası kimi nümunə göstərilib. Burada iqtisadi yox, siyasi məqam görürəm. Azərbaycana təzyiq olunduğu qənaətinə gəlmək olar. Bütün bu proseslərin hamısı ABŞ tərəfindən yönləndirilən Azərbaycanda demokratiya aktı adlı qanun layihəsinin fonunda aparılır. Hər şey Azərbaycan iqtidarını bütün istiqamətlərdə nokauta salmaq məqsədi güdür. Burada Qərbin Azərbaycanda süni problemlər yaratmaq cəhdi var. Bu problemlərlə məqsəd ölkədə bir yandan əhalinin kasıblaşdırılması, digər yandan isə siyasi elitaya qarşı müəyyən ayaqlanmanın yaranması üçün şərait yaratmaqdır. Onlar buna nail ola bilməzlər. Çünki Azərbaycan dövlətçiliyi kifayət qədər möhkəmdir.

Hər halda Azərbaycan həm daxili, həm də xarici siyasətinə köklü baxış etməlidir. Bu gün Ermənistanın müdafiə naziri qeyd edib ki, "biz atəşkəs rejiminin bitdiyi qənaitindəyik. Çünki Azərbaycan tez-tez atəşkəs rejimini pozur".

Atşkəs rejiminin bitməsi müharibənin başlaması anlamına gəlir ki, bu da çox təhlükəli tendensiyadır. Ermənistanın müdafiə nazirinin dediyi Rusiyadan tapşırıq kimi də dəyərləndirilə bilər. Necə olur ki, Bern şəhərində Dağlıq Qarabağ probleminin sülh yolu ilə həll edilməsi haqqında ATƏT-in Minsk qrupunun sədrlərinin hazırladığı birgə bəyanata hər iki prezident qol çəkir, ancaq bunun üstündən 2 gün keçməmiş Ermənistanın müdafiə naziri Bişkek pratokolunun bitdiyini və atəşkəs rejiminin daha mövcud olmadığı haqqında bəyanat yayır. Bu məsələnin təkcə ermənilərin iddiası olduğu qənaitində deyiləm. Buraya hər hansısa üçüncü dövlətin siyasi iradəsinin də qarışdığını istisna etmirəm.

Biz Qərblə münasibətləri düzəltmək üçün oturub fikirləşməliyik. Azərbaycan balanslaşdırılmış siyasəti qorumalı idi. Rusiya ilə nə çox yaxınlaşmaq olmazdı, nə də ki, Qərblə bu qədər döyüşmək olmazdı. Qərbin irəli sürdüyü tələblər o qədər də ağır tələblər deyil. Artıq onun icrası yolunda addımlar da atılıb. Leyla Yunusla Arif Yunusun həbsdən azad edilməsi, 31 dekabr Dünya Azərbaycanlılarının Həmrəylik Günü münasibəti ilə də yeni əfv fərmanı hazırlanır. Bu dəfəki əfv fərmanı geniş olmalı və Azərbaycanda birdəfəlik siyasi məhbus anlayışına son qoymalıdır. Qərb deyir, Azərbaycanda siyasi məhbuslar var. Azərbaycan siyasi rəhbərliyi bunu qəbul etmir. Bir konsensusa gəlib bu məsələni birdəfəlik bitirmək lazımdır.

Rusiya ilə düşmən olmaq da lazım deyil, Rusiyaya etimad göstərmək də lazım deyil. Azərbaycan bu dəqiqə düşdüyü vəziyyətdən çıxmaq üçün koseptual planda düşünməli və problemi aradan qaldırmaq üçün yollar aramalıdır".

Səxavət Məmməd
Ölkə.Az