İlham Əliyevə ad günü təbrikləri gəlməkdə davam edir

Gürcüstan baş naziri İrakli Qaribaşvili Azərbaycan prezidenti İlham Əliyevi doğum günü münasibəti ilə təbrik edib.

 İ. Qaribaşvilinin məktubunda deyilir:

“Zati-aliləri, hörmətli İlham Əliyev, icazə verin, doğum gününüz münasibəti ilə Sizə ürəkdən gələn ən səmimi təbriklərimi çatdırım. Bu xoş fürsətdən istifadə edərək, bildirmək istərdim ki, xalqlarımızın dostluğu kimi möhkəm təməl üzərində qurulan Gürcüstan ilə Azərbaycan Respublikası arasındakı strateji əməkdaşlığın daha da inkişaf etməsinə verdiyiniz şəxsi töhfələrinizi yüksək qiymətləndiririk. Biz, həmçinin çox şadıq ki, Sizin rəhbərliyiniz ilə Azərbaycan bütün istiqamətlərdə mühüm tərəqqiyə nail olaraq regionda ən inkişaf etmiş ölkələrdən birinə çevrilib. Mən səmimi qəlbdən inanıram ki, Gürcüstanla Azərbaycan arasındakı əməkdaşlıq xalqlarımızın mənafeyi naminə daha da dərinləşməkdə və güclənməkdə davam edəcək. İcazə verin, Sizi doğum gününüz münasibəti ilə bir daha təbrik edim, ali dövləti fəaliyyətinizdə uğurlar arzulayım. Sizə ən yüksək ehtiramımı bildirirəm”.

Azərbaycan prezidentini doğum günü münasibəti ilə həmçinin Rusiyanın Həştərxan vilayətinin qubernatoru Aleksandr Jilkin, bp şirkətinin Azərbaycan, Gürcüstan, Türkiyə üzrə regional prezidenti Qordon Birrell, Həmkarlar İttifaqları Ümumi Konfederasiyasının baş katibi Vladimir Şerbakov, MDB Parlamentlərarası Assambleyası Şurasının baş katibi Aleksey Sergeyev və Almaniya Bundestaqının üzvü Karin Ştrents təbrik ediblər.