\"Siyasi məhbus sayılanların hamısını azad edib Qərbin səsini birdəfəlik kəsmək olardı\"

Prezident İlham Əliyev dünən müxtəlif cinayətlərdən məhkum edilmiş bir sıra şəxslərin əfv olunması haqqında sərəncam imzalayıb

İmzalanmış sərəncam cəmiyyət tərəfindən yaxşı qarşılansa da, siyasi dairələr tərəfindən birmənalı qarşılanmayıb. Müxalif düşərgə əfv olunmuşlar siyahısında siyasi məhbusların olmadığına görə bu qərarı kəskin tənqid edib. ABŞ-ın Azərbaycana sanksiya tətbiq edəcəyi ilə bağlı məsələnin gündəmdə olduğu bir vaxtda Azərbaycan hökumətinin bu cür addım atmasının riskli olduğu deyilir.

Onsuz da gərgin olan Qərb və Azərbaycan münasibətlərinin bu əfv fərmanından sonra hansı istiqamətdə inkişaf edəcəyi sual doğurur.

Politoloq Qabil Hüseynli Ölkə.Az-a əfv sərəncamı və Qərb-Azərbaycan münasibətlərindən danışdı:

"Könül istərdi ki, əfv siyahısında siyasi məhbus adlandırılan, ancaq Azərbaycan tərəfindən siyasi məhbus kimi qəbul edilməyən şəxslərin də adı olsun. Heç olmasa bir neçəsinin adı olsa idi yaxşı olardı. Bu məsələdə Qərb də Azərbaycanla kifayət qədər qarşıdurmaya gedib. Məsələlər sakit tonda, diplomatik danışıqlarla həll edilməli idi. Nümayişkəranə surətdə Azərbaycana qarşı sanksiyaların təbiq ediləcəyi bildirilməsə idi, bəlkə də iş başqa cür yön ala bilərdi. Azərbaycanın Qərblə münasibətlərinin pisləşməsinin rəsmi Bakıya xeyir gətirəcəyi qənaətində deyiləm. Azərbaycanın Dağlıq Qarabağ kimi dərdi, problemi var. Bu məsələlərin həllində sözsüz ki, Qərbin də müəyyən rolu var. Azərbaycanın Qərblə əlaqləri var, xüsusilə enerji məsələlərində bu əlaqələr daha genişdir. Düşünürəm ki, siyasi məhbus sayılanların hamısını azad edib Qərbin səsini birdəfəlik kəsmək də olardı. Amma bu kənardan Qərbin diktəsi ilə atılmış bir addım kimi görünəcəkdi. Çox güman ki, elə ona görə də hakimiyyət bu addımı atmadı".

Səxavət Məmməd
Ölkə.Az