"Rusiyanın o ərzidə güclənməsi Türkiyənin sıxışdırılmasına gətirib çıxaracaq"

Suriya ordusu rusların köməyi ilə Latakiyanın şimalında yerləşən Türkmən dağını tamamilə ələ keçirib

Türkmən dağı bölgəsindəki 17 yaşayış məntəqəsini ələ keçirən Əsəd və rus birlikləri artıq Türkiyə sərhədinə dirəniblər.

Türk mediasında yayılmış xəbərlərə görə, ruslar vurulan təyyarənin pilotunun öldürülməsində ittiham etdikləri türkmən komandir Alparslan Çeliki axtarır.

Türkmən dağı və Latakiyanın ələ keçirilməsi barədə "Oğuz" Müstəqil Araşdırmaçılar Qrupunun rəhbəri, politoloq Vüqar Zifəroğlu Ölkə.Az-a danışıb:

"Türkmən dağı Latakiya ərazisinə daxildir. Bildiyimiz kimi Latakiya Rusiya üçün kifayət qədər strateji əhəmiyyətə malikdir. Ona görə ki, orada Rusiyanın hərbi bazası yerləşir. Ümumiyyətlə o bölgə Rusiya üçün prinsipial əhəmiyyətə malik olduğu üçün rəsmi Moskva Suriyada fəal hərbi əməliyyatlara başladı. Əslində o ərazinin türkmən ordusundan geri alınması gözlənilən bir şey idi. Ötən ilin oktyabr, noyabr aylarında Rusiya hərbi təyyarələri Türkmən dağı ərazisini bombalayanda 25 minə yaxın türkmən mühasirəyə düşmüşdü. O zaman da bilinirdi ki, bu proses davam edəcək. Çünki ərazinin özü Rusiya üçün kifayət qədər strateji əhəmiyyətə malikdir.

Həm Suriyada, həm də İraqda türkmənlərin mövcudluğu Türkiyəyə əlavə güc verirdi. Rusiyanın orada üstünlük əldə etməsi, o cür strateji əhəmiyyətə malik yeri ələ keçirməsi Türkiyə üçün son dərəcə mənfi bir haldır. Rusiyanın o ərazidə güclənməsi Türkiyənin sıxışdırılmasına gətirib çıxaracaq. Rusiya Suriyada öz mövqelərini gücləndirməkdə davam edəcək. Bu proqnozlaşdırılırdı. Təəssüf ki, bu olmalı idi...

İnandırıcı deyil ki, Türkiyə diplomatik ritorikadan daha sərt addımlara əl atsın. O ərazi Rusiya üçün çox prinsipial əhəmiyyət daşıyır. Türkiyənin atacağı hər hansı bir addım nəinki Rusiya-Türkiyə münasibətlərini gərginləşdirəcək, eyni zamanda bölgədə ciddi proseslərin başlamısına təkan verə bilər. Bu məsələdə İran faktoru da var. O ərazinin rus qoşunları tərəfindən nəzarətə götürülməsi o deməkdir ki, eyni zamanda Əsəd qüvvələri də nəzarəti ələ götürür. Əsəd qüvvələrinin o ərazidə nəzarəti ələ götürməsi həm də İranın da o əraziyə nüfuz etməsi deməkdir. Bu anlamda daha diqqətli davranılmalıdır. Hər hansısa düşünülməmiş bir addım daha ciddi fəsadlara gətirib çıxardacaq. Bu anlamda Türkiyə proseslərdə daha diqqətli davranacaq. Ancaq Türkiyə Türkmənləri müdafiə etməkdə davam edəcək. Türkiyə türkmənlərə həmişə dəstək olub, yenə də dəstək olmaqda davam edəcək".

Qeyd edək ki, Rusiya Suriyada hərbi əməliyyatlara 30 sentyabr 2015-ci ildən başlayıb.

Səxavət Məmməd
Ölkə.Az