Politoloq: Putin Sarkisyana tapşırıb ki, Qarabağ məsələsinə toxunma
AŞPA-nın qış sessiyası çərçivəsində “Dağlıq Qarabağ və Azərbaycanın işğal olunmuş digər ərazilərində zorakılıq hallarının artması” adlı qətnamə layihəsi qəbul edilməyib.
“Azərbaycanın sərhəd rayonlarının sakinləri qəsdən sudan məhrum edilib” adlı qətnamə isə qəbul edilib.
Bu məsələlərlə bağlı Milli Məclis sədrinin birinci müavini Ziyafət Əsgərov bildirib ki, ATƏT-in Minsk Qrupu başda olmaqla, Ermənistanın işğalçılıq siyasətini müdafiə edənlər var. Minsk Qrupu sözün əsl mənasında mənasız təşkilata çevrilib.
Bununla bağlı politoloq Zərdüşt Əlizadə Ölkə.Az-a danışıb:
"ATƏT-in Minsk qrupu öz funksiyasını yerinə yetirib. Minsk qrupu tərəflər arasında sülh danışıqlarının təşkilini edib, dinc yolla tənzimləmələri təklif edib, ən yüksək səviyyədə danışıqların getməsini təşkil edib. İndi Minsk qrupunun təqsiri nədir ki, tərəflər münaqişəni həll etmək istəmir? Sarkisyan erməni xalqına yalanlar danışır ki, görüşürük, münaqişəni həll etmək istəyirik. Ancaq əslində münaqişəni həll etmək istəmirlər. Putin Sarkisyana tapşırıb ki, Qarabağ məsələsinə toxunma, toxunmasan hakimiyyətdə qalacaqsan.
Minsk qrupunun həmsədirləri yüksək məbləğdə maaş alır. Ona görə də, nə isə etməlidirlər, göstəriş xatirinə də nə isə etməlidirlər. Minsk qrupunun indiki halda olmasının heç bir mənası yoxdur. Ona görə ki, o qrumun sözünə baxan da yoxdur. Əgər tərəflər danışıqlar istəmirsə vasitəçi nəyə lazımdır? 5-6 ildir ki, danışıqlar getmir. Ziyafət Əsgərovun "Minsk Qrupu sözün əsl mənasında mənasız təşkilata çevrilib", fikri doğrudur".
Səxavət Məmməd
