Zahid Oruc Səməd Seyidovu müdafiə etdi

Səməd Seyidov AŞPA-da Azərbaycan nümayəndə heyətinin rəhbəri vəzifəsindən kənarlaşdırılıb.

Səməd Seyidovun AŞPA-da Azərbaycan nümayəndə heyətinin rəhbəri vəzifəsindən kənarlaşdırılmasına səbəb kimi, Robert Uolterin "Dağlıq Qarabağda və Azərbaycanın digər işğal olunmuş ərazilərində gərginliyin artması" məruzəsinin müzakirəsinə cəmi bir həftə qalmış AŞPA-ya məktub göndərməsi və məktubda Azərbaycan torpaqlarının işğalı faktı qeyd olunmaması və Ermənistanın hərbi təcavüzünün AŞPA tərəfindən qınanmasına çağırışın əksini tapmaması göstərilir.

Bu məsələ ilə bağlı millət vəkili Zahid Oruc Ölkə.Az-a danışıb:

"Azərbaycanın Avropa Şurası Parlament Assambleyasındakı nümayəndə heyətinin tərkibi prezidentin seçimidir. Orada hər bir üzv beynəlxaq məkanda fəaliyyətinin faydasına görə müəyyən olunub. Burada hər hansısa şəxsin seçimində yalnışlıq ola bilməz. O cümlədən Səməd Seyidov ötən dövr ərzində Azərbaycanla Qərb ölkələrinin parlamentləri arasında əlaqələrin qurulmasında, diplomatik fəaliyyətin ən yüksək şəkildə formalaşmasına, Azərbaycan dövlətinin maraqlarının orada güclü bir şəkildə təmsil olunmasına xidmət edib. Bu mənada təcrübəli siyasət adamının və dövlət başçısının kursuna qəlbən çox bağlı olan bir şəxsin Qarabağın işğalı mövzusunda səhv etməsi mümkün deyil.

Son sessiyada fərqli bir vəziyyət yaranmışdı və Azərbaycanın nümayəndə heyəti digər üzvümüzün rəhbəliyi altında sessiyaya qatılmış oldu. Yeri gəlmişkən, orada aparılan müzakirələr ölkəmiz üçün əhəmiyyətlidir. Xüsusilə də ikinci sənəd nə qədər deklorativ xarakter daşısa da, siyasi əhəmiyyətinə görə dəyərləndirilsə də, bu bizim Ermənistanın xüsusi işğalçılığını özündə əks etdirən, Sərsəng su ambarının ətrafının işğala, təcavüzə məruz qaldığını tanıyan və digər müddəalarla da zəngin olan, əvvəlki qərarları, qətnamələri dolğun bir şəkildə genişləndirən bir sənəddir. Bunu da məğlubiyyət, ermənilərin qələbəsi kimi də dəyərləndirmək çox yalnışdır. Bir sözlə ümidvaram ki, Səməd Seyidov əvvəlki kimi nümayəndə heyətində fəaliyyətini davam etdirəcək. Bu heyət kifayət qədər özünü doğruldub".

Səxavət Məmməd
Ölkə.Az