"Azərbaycan Minsk qrupundan imtina etməlidir"

Son günlər Azərbaycan tərəfi ATƏT-in Minsk qrupunun fəaliyyəti barədə kəskin tənqidlər səsləndirir.

Bir neçə gün öncə Milli Məclisin vitse-spikeri Ziyafət Əsgərov Minsk qrupunu mənasız qurum adlandırıb. Azərbaycanın Xarici İşlər naziri Elmar Məmmədyarov isə Minsk qrupunun fəaliyyətindən narazı olduğunu bildirib.

Bununla bağlı millət vəkili Araz Əlizadə Ölkə.Az-a danışıb:

"Ziyafət Əsgərov və Elmar Məmmədyarov indi ATƏT-in Minsk qrupundan narazılıq edirlər. Ancaq Minsk qrupu yarananda o zaman Azərbaycan Sosial Demokrat Partiyasının sədri kimi çıxış etdim ki, bu qurumun heç bir əhəmiyyəti yoxdur. Bu qurum Qarabağ probleminin həllində heç bir rol oynaya bilməyəcək. Çünki ATƏT-in özü tövsiyə xarakterli qərarlar qəbul edə bilir. Loru dildə desək, sən mənə tövsiyə edirsən, mən sənin tövsiyənə fikir vermirəm, qarşılığında mənə nə edəcəksən? Heç nə.

Minsk qrupu Qarabağ probleminin həlli istiqamətində heç nə edə bilməyəcək. Ona görə yox ki, etmək istəmir, ona görə ki, bunu etmək üçün səlahiyyətləri yoxdur. Azərbaycan Minsk qrupunun vasitəçiliyindən imtina etsə, heç bir şey baş verməz. 20 ildən artıqdır ki, bir qrup heç nə edə bilməyib, o halda onun davamının nə mənası var? Azərbaycan bu qrumdan imtina etməlidir. Məndən aslı olsa, Minsk qrupu yaranandan imtina edərdik.

Biz məsələni BMT-nin Təhlükəsizlik Şurasının üstünə atmalıyıq. Qarabağ məsələsi ilə bağlı BMT-nin Təhlükəsizlik Şurasının 4 qətnaməsi var. BMT-nin nizamnaməsi var, orada bildirilir ki, hər hansısa bir dövlət BMT-nin Təhlükəsizlik Şurasının qətnamələrini yerinə yetirmirsə, ona qarşı siyasi, iqtisadi və hərbi sanksiyalar tətbiq edilə bilər".

Səxavət Məmməd
Ölkə.Az