Siyavuş Novruzov Almaniyadakı bəzi azərbaycanlılara qarşı tədbir görülməsinə çağırıb
"Azərbaycan dövlətinin, Azərbaycan Prezidentinin mediaya daim diqqətli olmasının bariz sübutları ortadadır.
Əfsuslar olsun ki, bu gün medianın başqa istiqamətləri də mövcuddur. Əsasən xaricdə yaşayan və Azərbaycan dövlətinin, Azərbaycan Prezidentinin apardığı siyasəti, ölkə rəhbərinin beynəlxalq səviyyədə nümayiş etdirdiyi ədalətli mövqeni qəbul etməyən dairələrin təsiri altında olan şəxslər Azərbaycan dövləti, xalqı, ordusu və dövlət başçısı haqqında həqiqətə uyğun olmayan məlumatlar paylaşır, yazılar dərc edirlər".
Ölkə.az xəbər verir ki, bunu deputat Siyavuş Novruzov parlamentdə çıxışı zamanı deyib.
Deputat hesab edir ki, biz qanunvericiliyimizdə bu məsələlərə çox ciddi yanaşmalıyıq.
"İki yüz ildən artıq müddətdə həll olunmayan bir məsələni cənab Prezident həll etdi. Qarabağ və işğal altında olan digər ərazilər azad edildi. Şah İsmayıl Xətai dövründən sonra ilk dəfə olaraq Azərbaycanın ərazi bütövlüyü tam şəkildə təmin olundu.
Bu gün bəzi şəxslər bu uğurlardan yazmaq əvəzinə Ağdamın işğal olunmasına görə bugünkü hakimiyyəti ittiham etməyə çalışırlar. Halbuki bununla bağlı məhkəmə qərarları mövcuddur. Ağdamın, Füzulinin və digər rayonların işğalı ilə bağlı məhkəmə sənədlərində həmin dövrdə məsuliyyət daşıyan şəxslərin adları göstərilib.
Necə ki, Ağdam təhvil verildi, necə ki, Xocalı təhvil verildi, necə ki, Kəlbəcər təhvil verildi, necə ki, Şuşa təhvil verildi – bunların hamısı tarixdə öz əksini tapıb.
Heydər Əliyev hakimiyyətə gələndə onun ordusu yox idi. O, ölkəyə tək gəlmişdi. Həmin dövrdə ordunun hissələri geri çəkilmişdi, batalyonlar dağılmışdı. Bunlar hamımızın yaddaşındadır və hamımız bunların şahidi olmuşuq.Tarixi saxtalaşdırmaq olmaz".
Deputat əlavə edib ki, bu gün Almaniyada yaşayan bəzi şəxslər Azərbaycan dövlətinin əleyhinə çıxış edir, müxtəlif ittihamlar səsləndirirlər: "Hesab edirəm ki, bu kimi halların araşdırılması vacibdir və müvafiq tədbirlər görülməlidir.
Bir daha təkrar edirəm ki, bu gün Azərbaycan tarixində heç vaxt olmadığı qədər ərazi bütövlüyünü təmin edib. Bu nəticəni əldə edən isə Ali Baş Komandan, Müzəffər Ali Baş Komandan cənab İlham Əliyevdir.
Hamımız onun sadiq əsgərləriyik və bundan sonra da dövlətimizin maraqlarının müdafiəsi naminə üzərimizə düşən vəzifələri yerinə yetirməyə hazırıq".
Mürtəza
