"Türkiyənin nüvə sənayesi Rusiyanın iştirakı olmadan da inkişaf edəcək"

Türk tələbələri Rusiyanın Milli nüvə araşdırmaları universitetindən qovublar.

İnstitut rəhbərliyi isə bildirib ki, türk tələbələr onların qərarı ilə deyil, Rusiya Federal Təhlükəsizlik Xidmətinin qərarı ilə ali məktəbdən çıxarılıblar.

Bununla bağlı politoloq Zərdüşt Əlizadə Ölkə.Az-a danışıb:

"Rusiya dünyada həm elm sahəsində, həm də nüvə sahəsində aparıcı dövlətlərdən biridir. Rusiyanın görkəmli nüvə alimləri və nüvə istehsal etmək üçün texnologiyaları var. Hər kəsə bəlli idi ki, Rusiya ilə Türkiyə arasında Ağquyu atom elektrik stansiyası tikilməsi haqqında müqavilə imzalanmışdı. Rusiyanın bankları bu layihə üçün Türkiyəyə 20 milyard dollar borc verirdilər ki, atom elektirik stansiyası inşa edilsin. Sonradan Türkiyə oradan gələn gəlirlə bankların pulunu ödəyəcəkdi. Türkiyənin elm və sənayesi Rusiyanın elm və sənayesi ilə bağlı olacaqdı. Rusiya da bundan böyük mənfəət götürəcəkdi. Təbii ki, Ağquyu Türkiyədə yeganə atom elektrik stansiyası olmayacaqdı. Bu zaman Rusiyanın şansı artırdı ki, böyük bir bazarda on illərlə gəlir əldə etsin.

Bunu Putin özü məhv elədi. İndi də türk tələbələri Milli nüvə araşdırmaları universitetindən qovdurur. Milli nüvə araşdırmaları universiteti Rusiyanın ən güclü elm mərkəzlərindən biridir. Türkiyənin nüvə sənayesi və bu sahədəki elmi Rusiyanın iştirakı olmadan da inkişaf edəcək. Bu məsələdə Rusiya itirdi.

Rusiyanın qaraguruhçuları xarici siyasəti uğurlu hesab edirlər, ancaq faktiki olaraq bu gün baş verənlər Qərbin uğurlarıdır. ABŞ və Qərb diplomatiyası nail oldu ki, Rusiyaya çox yaxın ölkələr olan Ukrayna və Türkiyə ilə Moskvanın əlaqələri pisləşdi. Keçmiş sovet məkanında olan ölkələr imkanları olsa, məmnuniyyətlə Rusiyadan uzaqlaşarlar. Rusiya sadəcə olaraq münaqişə qarmaqları ilə keçmiş sovetlər birliyi dövlətlərini öz itaətində saxlayır".

Səxavət Məmməd
Ölkə.Az