Partiyaların Siyasi Fondları yaradılsın
Azərbaycan Xalq Cəbhəsi Partiyasına görə, ölkənin gələcək inkişafı, hazırda ölkədə mövcud olan iqtisadi böhrandan ağrısız çıxmağın əsas şərtlərindən biri müxalifətlə iqtidar arasında dialoqdur.
Ölkə.Az xəbər verir ki, bu barədə AXCP-nin hökumətə təqdim etdiyi növbəti təkliflər paketində bildirilir.
Qeyd edilir ki, burda əsas məsələ real dialoq variantının tətbiq olunmasıdır. Əgər dialoq görüntü xarakterli olursa, tərəflər arasında uçurum daha da dərinləşir.
“Dialoq təklifi hakimiyyət tərəfdən irəli sürülməli və təşkil edilməlidir. Müxalifətin dialoq təşkil etmək üçün nə səlahiyyəti, nə də kifayət qədər təzyiq vasitələri var. Müxalifət dialoqda maraqlıdır. Hakimiyyətə də dialoq lazımdırsa, görüşü təşkil etməlidir. Yox, əgər iqtidar dialoqa ehtiyac görmürsə, müəyyən güzəşt və təkliflərə açıq deyilsə, o zaman dialoqdan imtina etmək gərəkir. Onun üçün də dialoq təklifini iqtidar irəli sürməli və predmetini müəyyən etməlidir. Əgər dialoqun predmeti və ardınca nəticəsi olmayacaqsa, onda müxalifətin də növbəti dialoq şousundan imtina etməsində siyasi fayda var”.
Antiböhran paketində vurğulanır ki, dialoqun baş tutması və konkret əsas yaratması üçün ilkin olaraq qeyd olunan mövzularda geniş tərkibdə dialoqun keçirilməsi vacibdir:
Müxalifət partiyalarının təqdim etdiyi anti-böhran təklifləri ilə bağlı geniş tərkibli (müxtəlif nazirlik, komitə və parlament üzvləri, əksər müxalifət qüvvələrinin təmsilçiləri) dialoq keçirilməlidir.
Hazırda Azərbaycanda 55 qeydiyyatdan keçmiş partiya var. Təbii ki, bu partiyaların çoxunun fəaliyyəti yoxdur. Müxalifət də partiyaların sayının azaldılmasında maraqlıdır. Artıq iqtidarın fəaliyyətsiz partiyaların bağlanması ilə bağlı çağırışı var və yəqin ki, onların qapadılması ilə bağlı konkret addımlar atılacaq. Partiyaların qapadılmasının siyasi gərginlik yaratmasını önləmək, bunun ayrı-ayrı şəxslər tərəfindən fərdi olaraq siyasiləşdirilməsinin qarşısını almaq və ortada hökm sürən narahatlığı aradan qaldırmaq üçün bütün partiyaların iştirakı ilə dialoqun keçirilməsini vacib sayırıq. Biz də partiyaların sayının azaldılmasına xoşgörülü yanaşırıq və mövcud vəziyyətdə 9-10 partiyanın “Siyasi partiyalar haqqında qanun”a uyğun ola biləcəyi düşüncəsində olduğumuzu bildiririk”.
Qeyd edilir ki, Azərbaycanda siyasi partiyaların sayının qanunauyğun şəkildə tənzimlənməsindən sonra onların dövlət tərəfindən ofis və digər zəruri ehtiyaclarının təminatı həyata keçirilməlidir və dialoqun mühüm predmetlərindən biri də bu olmalıdır:
"Siyasi partiyalar haqqında" qanuna dəyişikliklər barədə dialoqun keçirilməsi də zərurətdir. Siyasi partiyaların Siyasi Fondlarını qurması beynəlxalq təcrübədir və ölkəmiz üçün məqbuldur. Siyasi Fondlar Hollandiya, Böyük Britaniya, ABŞ, İsveç, Almaniya, İspaniya, İtaliya və digər ölkələrdə mövcuddur və əsasən, onlar ideoloji baxışları üzrə Siyasi Fondlarını yaradıblar. Azərbaycanda da belə fondların yaradılmasına icazə verilərsə, siyasi partiyaya kömək etmək istəyən fərd və hüquqi şəxslər vəsaiti həmin fonda köçürə bilər və bu da hökumətin nəzarətində olar”.
