\"Rusiyanın etdiyi hərəkətlər, atdığı addımlar ancaq öz vəziyyətini gərginləşdirir\"

Rusiya Federal Təhlükəsizlik Xidməti Ekaterinburqda yeddi İŞİD üzvünü həbs edib

Rusiya xüsusi xidmət orqanları həbs edilən İŞİD-çilərin başçısının uzun illər Türkiyədə yaşadığını iddia edir. Buradan belə nəticə çıxarmaq olar ki, Rusiya bu məsələdə də "Türkiyə izi" axtarır.

Bununla bağlı hərbi ekspert Üzeyir Cəfərov Ölkə.Az-a danışıb:

"Bütün dünya Rusiyanın yalanlarına öyrəşməyə başlayıb. Bu gün dünyada Rusiyanın təbliğatına inanan elə də çox auditoriya qalmayıb. Ruslar hər dəfə yeni bir şey uyduraraq Türkiyənin adını müxtəlif cinayətlərdə hallandırırlar. Əslinə qalsa, Rusiya vəziyyətin düzəlməsi üçün lazımi addımları atacaq, ancaq görünən odur ki, ruslar türkləri nədəsə günahlandırmaq üçün min bir bəhanə axtarırlar. Rusların mətbuatdakı yazıları, televiziyalarındakı verilişləri ancaq Putinin reytinqini saxlamağa hesablanıb.

Hər kəs bilir ki, İŞİD-in ilhamvericisi, dəstəkçisi elə Rusiyanın özüdür. Suriya ərazisində terror təşkilatlarına aidiyyatı olmayan qocalar, cavanlar, körpələr bombardmana məruz qalırlar. Suriyada minlərlə günahsız insanın qanı Putinin vicdanı üzərindədir. Hesab edirəm ki, ermənilər üçün hər yerdə Azərbaycan əsgəri göründüyü kimi, Rusiyanın da gözünə istənilən bir təhlükədə Türkiyə görünür. Ruslar bir qədər ciddi olsalar yaxşıdır. Çünki günü-gündən onların etdikləri hərəkətlər, atdıqları addımlar öz vəziyyətlərini gərginləşdirir".

Səxavət Məmməd
Ölkə.Az