\"Özümü yüz dənə Əli İnsanovdan daha böyük lider hesab edirəm\"

Mediada çıxan bəzi xəbərlərdə iddia olunur ki, Əli İnsanov həbsxanadan çıxandan sonra müxalifətə qoşulacaq və müxalifətin lideri olacaq.

Hətta Müsavat və AXCP arasında Əli İnsanovu öz tərəflərinə çəkmək uğrunda mübarizənin getdiyi də deyilir. Əli İnsanov müxalif mətbuat tərəfindən cəmiyyətə Müsavat və AXCP-ni yenidən bir araya gətirə biləcək şəxs kimi təqdim edilir.

Bununla bağlı Azərbaycan Demokrat Partiyasının sədri Sərdar Cəlaloğlu Ölkə.Az-la öz fikirlərini bölüşüb:

"Lider o adamdır ki, mənsub olduğu qrupun bütün dəyərlərini qabarıq şəkildə özündə ifadə edə bilsin. Əli İnsanov yeni sima deyil, müəyyən ömür yaşayıb, müəyyən bir siyasi xətt tutub. O, uzun illər Azərbaycanın demokratik qüvvələrinə əks cəbhədə duran bir adam olub. Əli İnsanov Yeni Azərbaycan Partiyasını yaradanlardandır. Yəni onu lider kimi görən cəbhənin ideyalarını qabarıq şəkildə özündə ifadə edəcək adam deyil, əksinə bu ideyalara sözün həqiqi mənasında səmimi-qəlbdən nifrət edən adamdır. Bu baxımdan Əli İnsanov demokratik qüvvələrin lideri ola bilməz. Lider haradansa gətirilmir, lider müəyyən bir prosesin içində olur, siyasi lider alın təri ilə, zəhməti ilə o səviyyəyə gəlib çıxır. Əli İnsanovun həbs olunması onun demokratiya uğrunda mübarizəsi ilə bağlı deyil, onun iqtidar daxilində hakimiyyət iddiası ilə bağlı idi. Əli İnsanova qarşı irəli sürülmüş rəsmi ittiham da korrupsiyadır. Ona görə də, Əli İnsanov ölkədə demokratiya uğrunda mübarizə aparan qəhrəman deyil ki, türmədən çıxanda hansısa demokratik qüvvələrin başına gətirilsin.

Əli İnsanov demokratik qüvvələrin dilində danışa bilməz, o demokratik dili bilmir. Bir halda ki, biz bir-birimizin dilini bilmirik, onu necə qəbul edə bilərik? Əli İnsanovu öz partiyasına sıravi üzv qəbul edən müxalif partiyaya hörmət etmərəm. Bizim ən böyük qüsurlarımızdan biri odur ki, adamlar uzun illər demokratik qüvvələrə qarşı mübarizə aparır, ölkədə anti-demokratik şəraitin yaradılmasında xüsusi xidmətləri olur, sora iqtidardaxili mənafeləri toqquşan kimi birdən-birə onu demokratiya carçısı kimi elan edirik. Əli İnsanov 1991-93 illərdə AXC-Müsavat hakimiyyətində təmsil olunsa idi, sonradan Heydər Əliyevin komandasına keçsə idi, yenə deyə bilərdik ki, Rəsul Quliyev kimi geriyə qayıdır. Ancaq Əli İnsanov prinsipial olaraq həmişə Azərbaycan xalq hərəkatına əks cəbhədə olub. Əli İnsanovun demokratiyaya xeyir vermək imkanı yoxdur. Müxalifətdə bəzi qüvvələr var ki, hakimiyyətdən ayrılmış bəzi adamların əlaqələrindən, maliyyə vəsaitlərindən istifadə edirlər. Bu yalnışdır. Qurani-Kərimdə Allah buyurur, "Haram yolla qazanılmış pulla məscidləri təmir etməyə imkan verməyin!".

Azərbaycan siyasi təcrübəsi göstərdi ki, kimlərsə həqiqi demokrat deyil, hakimiyyət incikliyinə görə demokratik cəbhəyə keçiblər və onlar xeyir verməkdən çox demokratik hərəkata ziyan veriblər. Müsavat Partiyasının təcrübəsinə baxın. Vaxtı ilə hakimiyyətdə olmuş qüvvələri Müsavat Partiyası öz sıralarına çəkirdi. Qabil Hüseynli, Rasim Musabəyov kimilərini götürək, indi onlar hansı cəbhədədirlər? AXCP özü də hakimiyyətdən uzaqlaşan müəyyən adamlarla sıx ünsiyyətə girdi, onları partiyaya cəlb etmək istədilər, sonradan həmin adamların davranışları bizə məlum oldu. Bu baxımdan bizim acı bir təcrübəmiz var. Demokratik qüvvələrin içərisindən çıxmayan adam demokratik qüvvələrə liderlik edə bilməz. Bu gün Azərbaycan müxalifətində liderlər var. Əli İnsanov o liderlərin ən kiçiyi ilə müqayisədə belə liderliyə layiq deyil. Sadəcə olaraq xalq uzun müddətdir onun yolunda zəhmət çəkən, onun içinə qarışan, ondan o qədər də fərqlənmək istəməyən insanları qəbul edə bilmir. Xalq düşünür ki, lider gərək gizlin ola, liderin mühafizəçiləri ola, lider xalqa yuxarıdan aşağı baxa. Bizim sovet təfəkkürü dəyişmədiyinə görə, bu gün Azərbaycanda liderə baxış budur. O zaman Elçibəyi də xalq buna görə dəstəkləmirdi. Demokratiya tələb edir ki, lider xalqdan seçilməsin, xalqdan seçilən lider, demokratik lider deyil.

Azərbaycan müxalifətinin özündə Əli İnsanovdan yüz dəfə böyük, ağıllı, savadlı, xalqını, millətini sevən, strateji düşüncə tərzinə malik liderlər var. Biri elə mən özüm. Özümü yüz dənə Əli İnsanovdan böyük lider hesab edirəm. Xalq bizi qəbul etmir, ona görə ki, xalq özü demokratikləşməyibdir. Biz demokratik lider obrazını yaradırıq, xalq isə demokratik düşüncəyə malik olmadığına görə bizi lider kimi qəbul edə bilmir".

Qeyd edək ki, 2005-ci ilin oktyabrında hakimiyyəti zorla ələ keçirmə ittihamı ilə həbs edilən Əli İnsanovun bir çox titulları, o cümlədən akademik fəxri adı geri alındı.

Səxavət Məmməd
Ölkə.Az