Elmar Məmmədyarov: “Dağlıq Qarabağ münaqişəsinin “dondurulmuş” olduğuna inanmırıq”
Azərbaycan Avropa İttifaqına strateji əməkdaşlıq sazişi layihəsini təqdim edib. Bunu Azərbaycanın xarici işlər naziri Elmar Məmmədyarov Avropa İttifaqının xarici əlaqələr və təhlükəsizlik siyasəti üzrə ali nümayəndəsi Federika Mogerini ilə görüşdən sonra keçirilən mətbuat konfransında deyib.
O bildirib ki, görüşdə saziş layihəsi ilə bağlı işin başlanğıcı üçün atılacaq addımlar barədə danışılıb. Elmar Məmmədyarov və Avropa İttifaqı rəsmisi Dağlıq Qarabağ münaqişəsini də müzakirə ediblər:
“Azərbaycan istəyir ki, bu münaqişə tezliklə həll olunsun. İnanmırıq ki, bu münaqişə “dondurulmuş” münaqişədir. Avropa İttifaqı da Minsk qrupu ilə birlikdə təkan verməlidir ki, münaqişəni yerindən tərpədək”.
Federika Mogerini isə bildirib ki, Avropa İttifaqı Azərbaycanın ərazi bütövlüyü və suverenliyini dəstəkləyir, Dağlıq Qarabağı tanımır. Avropa İttifaqının rəsmisi bəyan edib ki, münaqişənin status-kvosu qeyri-sabitdir. O, tərəfləri münaqişəni danışıqlar və sülh yolu ilə həll etməyə çağırıb və bildirib ki, Dağlıq Qarabağ məsələsi Aİ üçün prioritet olaraq qalır.
Aİ-in ATƏT-in Minsk qrupunun münaqişənin nizamlanması istiqamətində göstərdiyi səyləri dəstəklədiyini deyən F.Mogerini tərəflər arasında qarşılıqlı inamın yaranmasının vacibliyini qeyd edib.
Federika Mogerini Azərbaycanın Ümumdünya Ticarət Təşkilatına üzvlüyünün səmərəli addım ola biləcəyini də deyib. O, hesab edir ki, ÜTT-yə üzvlük daha dərin iqtisadi inteqrasiyaya gətirib çıxaran bir addımdır: “Bu, Azərbaycanda keçirilən iqtisadi islahatlara da öz töhfəsini vermiş olardı”.
F. Mogerini E. Məmmədyarovu Brüsselə dəvət etdiyini və bu səfərin uyğun bir vaxtda reallaşmasını istədiyini bildirib. (APA)
