\"Rusiya müharibəsiz yaşaya bilməz, hətta mövcud ola bilməz\"

"Rusiyanın Suriyadakı aqressiyası Moskvanın Ukrayna məsələsində öz xeyrinə güzəştlər əldə etməklə bağlıdır"

Bu bəyanatla ABŞ-ın hərbi kəşfiyyat idarəsinin rəhbəri general Vinsent Stüart deyib.

Vinsent Stüart bildirib ki, Rusiyanın Suriyadakı hərbi kampaniyası əslində dünyanın diqqətini Ukraynadan yayındırmaqdır. Bununla Moskva bir konfliktdən istifadə edərək digər konfliktdə vəziyyəti öz xeyrinə dəyişmək istəyir.

Rusiyanın Suriya planı barədə politoloq Qabil Hüseynli Ölkə.Az-a danışıb:

"Vinsent Stüartın dediyi Rusiyanın istədiklərinin bir hissəsidir. Rusiya dünyadakı təkqütblü vəziyyəti dəyişmək istəyir. Rəsmi Moskva özünü super dövlət kimi təsdiq etdirib soyuq müharibə dövrünün qaydalarına uyğun beynəlxalq münasibətlər sistemi yaratmaq istəyir. Rusiya Suriyada müharibəyə qoşulmaqla ilk növbədə Qərbə əzələ nümayiş etdirir və Qərblə münasibətlərdə strateji üstünlük qazanmaq istəyir. Bu həm də super dövlət kimi geosiyasi planda özünü təsdiqin bir formasıdır.

Rusiya Suriyada son dövrlərdə istehsal edilən bəzi silahları sınaqdan keçirir. Ruslar üçün əhəmiyyəti yoxdur, mülki əhali, səhiyyə, məktəb binası, rus pilotlar istənilən hədəfə atəş açırlar, bomba yağdırırlar. Rusiya SSRİ dövründən qalma raketlər sistemini də sınaqdan keçirir. Xəzərdən və Aralıq dənizindən atılan ballistik raketlər 1960-70-ci illərdə SSRİ-də istehsal edilmiş silahlardır. Rusiyanın ballistik və nüvə silahları sisteminin 90%-i SSRİ dövründən qalma silahlardır.

Bəzən ABŞ generalları Rusiya ordusundan qorxu hissi ilə danışırlar. Rusiyanın bu gün üzə çıxardığı silahların yalnız bir hissəsi yeni istehsal edilib. Rusiya silahından ağız dolusu danışan Qərb generalları nədənsə müasir texnologiyaya malik, kifayət qədər effektli silahlarından ya qəsdlə danışmaq istəmirlər, ya da bunların hamısı məlumatsızlıqdan qaynaqlanır. Rusiyanın Suriyadakı hərəkətlərinin məqsədi Yaxın Şərqdə İranla birgə yeni bir geosiyasi güc formalaşdırmaqdır. Rusiyanın uzağa gedən planları var. Bu planlar gah Baltikyani respublikaları qorxutmaqla, gah Cənubi Qafqaz ölkələrinə şantaj və təzyiq etməklə özünü büruzə verir. Adamda elə bir təsəvvür yaranır ki, Rusiya öz vətəndaşlarının qayğıları ilə məşğul olmayan, gündəlik istehsal və təsərrüfat proseslərini tamamilə unutmuş, milli gəlirin böyük hissəsini silah istehsalına xərcləyərək militarist bir dövlətə çevrilməkdədir. Həqiqətən də Rusiyada milli gəlirin 60%-ə qədəri ordunun silahlandırılmasına sərf edilir. Dünyada heç bir dövlət milli gəlirin bu qədər hissəsini hərbiyə xərcləmir. Rusiyadakı bugünkü vəziyyət rusların böyük vətən müharibəsi dediyi, ikinci dünya müharibəsindəki bir şüara çox oxşayır: Hər şey cəbhə üçün, hər şey qələbə üçün.

Rus yazıçılarından birinin yazısını oxudum, o qeyd edir ki, Rusiya müharibəsiz yaşaya bilməz, hətta mövcud ola bilməz. Çünki istənilən müharibə rus xalqının mili ruhunu dirçəldir, onu daha da mübariz edir. Bilmirəm nə dərəcədə doğru təsbitdir, ancaq Rusiyanın indiki vəziyyəti rus yazıçısının saxta patriotizminin nə qədər saxta olmasını aydın sübut edir. Rusiya az qala bütün dünyaya müharibə elan etmiş bir dövlət kimi görünür. Bu müharibədən də sanki özünü qalib çıxmış kimi hesab edir. Çünki Qərb, ABŞ və Rusiya ilə açıq qarşıdurmaya getmək istəmir".

Səxavət Məmməd
Ölkə.Az