"İran həmişə Türkiyənin ayağının altını qazıb"

İran PKK-ya 3,5 milyon dollarlıq pul və çoxlu silah yardımı edib

Bununla bağlı məlumat Türkiyə hakimiyyətinə yaxınlığı ilə bilinən "Yeni Şafak" qəzetində dərc olunub. Maraqlısı bundadır ki, bu material "Yeni Şafak" qəzetində Türkiyənin baş naziri Əhməd Davudoğlunun İran səfəri ərəfəsində dərc olunub.

Bununla bağlı Təhlükəsizlik Araşdırmaları Mərkəzinin rəhbəri, Milli Təhlükəsizlik Nazirliyinin keçmiş polkovniki, müstəqil ekspert İlham İsmayıl Ölkə.Az-a danışıb:

"İranın PKK-ya yardımı istər silah, istər ərazi cəhətdən ilk hadisə deyil. İran dəfələrlə bu addımı atıb. Diplomatik gediş-gəlişlər həmişə olub.

Əgər Türkiyə istəyirsə ki, İranla həqiqi mənada dost olsun, bunun üçün Ankara dövlət maraqları çərçivəsində öz xarici siyasətini qurmalı idi. Ancaq islam xətti Türkiyənin dövlət maraqlarını üstələdi. İndi məhz ona görə Türkiyə zəifləyib. Türkiyə sözün həqiqi mənasında zəifləyib. Rusiya KİV-lərində Suriya kürdlərinin və Türkiyə kürdlərinin mübarizəsini "milli azadlıq mübarizəsi" kimi təbliğ edirlər. İran və Rusiya kürdlərə hər mənada dəstək olur. Bu ilk dəfə deyil.

İrana zəif Türkiyə lazımdır. Ona görə də, Türkiyəni zəif salan, onu daim təzyiq altında saxlayan PKK-ya aktiv şəkildə yardım edir. Bu ilk dəfə deyil, bu gündən sonra da olacaq. İranın Türkiyəyə münasibəti diplomatik təbəssümdür. Əslində isə İran həmişə Türkiyənin ayağının altını qazıb".

Səxavət Məmməd
Ölkə.Az