İlham Əliyev Canelidzeni qəbul etdi
Azərbaycan Prezidenti İlham Əliyev martın 7-də Gürcüstanın xarici işlər naziri Mixail Canelidzeni qəbul edib.
Ölkə.Az dövlət başçısının rəsmi saytına istinadən xəbər verir ki, Azərbaycana ilk rəsmi səfərindən məmnunluğunu bildirən Mixeil Canelidze iki ölkənin müvafiq qurumları tərəfindən birgə işlərin və həyata keçirilən bütün layihələrin fəal şəkildə davam etdirildiyini deyib.
Ölkələrimizin xarici işlər nazirlərinin əlaqələrinin mütəmadi xarakter daşıdığını deyən prezident İlham Əliyev Azərbaycan və Gürcüstan Xarici İşlər nazirlikləri arasında əməkdaşlığın önəmini qeyd edib.
Azərbaycan ilə Gürcüstan arasında bir sıra məsələlərin uğurla həll edildiyini və ölkələrimizin bir-birinə daha da yaxınlaşdığını bildirən dövlət başçısı özünün Gürcüstana ötənilki uğurlu rəsmi səfərini xatırlayıb.
Əməkdaşlığın fəal şəkildə davam etdirildiyini vurğulayan prezident İlham Əliyev əlaqələrin siyasi, iqtisadi, energetika, humanitar sahələrdə və eləcə də çoxtərəfli formatda daha da inkişaf etdirilməsi üçün yaxşı imkanların olduğunu deyib.
Dövlət Mixail Canelidzenin Azərbaycana səfərinin ölkələrimiz arasında bu il üçün birgə tədbirlərin proqramının nəzərdən keçirilməsi baxımından yaxşı imkan yaradacağına ümidvar olduğunu bildirib.
