"Bu terror təşkilatlarının birləşməsi Türkiyəni terrorla mübarizədən çəkindirə bilməz"
Terror təşkilatları Türkiyəyə qarşı birləşdi.
"Xalqların Birləşmiş İnqilab Hərəkatı" adlı terror təşkilatına PKK, TKP/ML, THKP-C/MLSPB, MKP, TKEP-LENİNİST, TİKB, DKP, Devrimci Karargah və MLKP terror təşkilatları daxildir.
Yeni yaranan terrorçu birliyin hədəfi Türkiyədir.
Bununla bağlı "Oğuz” Müstəqil Araşdırmaçılar Qrupunun rəhbəri, politoloq Vüqar Zifəroğlu Ölkə.Az-a danışıb:
"1960-cı illərin sonu, 70-ci illərin əvvələrindən başlayaraq Türkiyədə bölücü solçu hərəkat yarandı. Bildiyimiz kimi bölücü solçu hərəkat 1970-ci illərin sonu, 80-ci illərin əvvəllərində də, Türkiyəni vətəndaş qarşıdurması vəziyyətinə gətirib çıxardı. Adlarını qeyd etdiyiniz terror təşkilatlarının hamısı həmin o solçu, marksist yönümlü bölücü təşkilatlardır.
O təşkilatların yaradılmasında o zaman Sovet İttifaqı hökuməti aktiv rol oynayırdı. Solçu terror təşkilatlarının yaradılması, ideologiyası və maliyyəsi Sovet imperiyasından gəlirdi. Hazırda vəziyyəti Türkiyə-Rusiya qarşıdurması konteksində dəyərləndirsək, son zamanlar Türkiyənin kürd terror quruplaşmalarına qarşı apardığı aktiv hərbi əməliyyatları göz önünə gətirsək, o zaman 7-8 kiçik terror təşkilatının biraraya gəlib, bəyanatla çıxış etməsi təbii qarşılanmalıdır. Bu birləşməni ciddiyə almağın da tərəfdarı deyiləm. O birliyin tərkibində ən ciddi terror təşkilatı PKK-dır. PKK artıq 10 illərdir ki, Türkiyəyə qarşı aktiv terror fəaliyyəti ilə seçilir.
"Xalqların Birləşmiş İnqilab Hərəkatı" adlı terror təşkilatının tərkibinə qatılan digərləri kiçik quruplaşmalardır. O təşkilatların indiyə qədər xırda, lokal terror əməliyyatları olub. İnandırıcı deyil ki, yeni yaranan təşkilat Türkiyəni bölücülüyə, etnik separatizmə qarşı apardığı haqlı mübarizədən yayındırsın. Sadəcə olaraq Rusiya tərəfi, Qərb bu təşkilatdan Türkiyəyə qarşı təzyiq vasitəsi kimi istifadə etməyə çalışacaq, necə ki, indiyə qədər də istifadə ediblər. Bu təşkilatın Türkiyəyə qarşı ciddi təhlükə göstərəcəyinə inanmıram".
Səxavət Məmməd
Ölkə.Az
