Razi Nurullayev terroru lənətlədi
Azərbaycan Xalq Cəbhəsi Partiyasının sədri Razi Nurullayev Türkiyənin paytaxtı Ankarada törədilən terror aktını lənətləyərək türk xalqına başsağlığı verib.
Ölkə.az AXCP sədrinin başsağlığını təqdim edir
Türkiyədə baş verən terror aktını lənətləyirik və yeganə təsəllimiz də günahkarların cəhənnəm odunda yanacaqlarıdır.
Bugün qəlbimiz Ankara üçün döyünür, göz yaşlarımız Ankarada şəhid edilən qardaş-bacılarımız üçün axır. Lənətə gəlmiş terror öz çirkin simasını bir daha göstərdi, qardaş Türkiyədə 30-a yaxın günahsız insan qətl edildi. Biz əminik ki, Türkiyə bu vəhşiliyi cavabsız qoymayacaq. Əminik ki, bu vəhşiliyi həyata keçrilənlər tezliklə qanun qarşısında cavab verməli olacaqlar.
Bütün türk ulusuna, türk qardaş-bacılarımıza və bütün insanlığa başınız sağolsun deyirik. Terror elə bir bəladır ki, ondan heçbir dövlət sığortalanmayıb və buna görə də bütün dünya terror qarşı birlik olmalıdır. Ötən terror aktında da söyləmişdik, yenə də təkrar etməkdə fayda var. Azərbaycan Türkiyənin yanında olduğunu nümayiş etdirmək üçün Türkiyə ilə bərabər matəm elan edərsə, bu terrora qarşı ən sərt cavabımız olar. Hökumət ciddi düşünsün! Türkiyənin dərdi dərdimiz, sevinci sevincimizdir.
Başını dik tut, Türkiyə! Yaxşı günündə də, pis günündə də yanındayıq. Nə edək ki, bu kimi mənfur hərəkətlərin qarşısını almaqda insanlıq aciz.
