\"Ankara terrorunun Ərdoğanın Bakı səfəri ilə heç bir əlaqəsi yoxdur\"

Türkiyənin paytaxtı yenidən terror aktına məruz qaldı.

Terror aktı zamanı 34 nəfər ölüb, 150-dən çox adam isə yaralanıb.

Terror aktı ilə bağlı diqqət çəkən məsələlərdən biri də, Ərdoğanın Bakı səfəri ərəfəsində bu hadisənin baş verməsidir. Bundan əvvəlki Ankara terroru da Türkiyə prezidentinin Bakıya səfəri ərəfəsində baş vermiş və Ərdoğanın səfəri təxirə salınmışdı.

Bununla bağlı politoloq Zərdüşt Əlizadə Ölkə.Az-a danışıb:

"Ankarada baş verən terror aktı dərin təəssüf doğuran hadisədir. Həqiqətən Türkiyəni laxlatmaq, parçalamaq istəyən qüvvələr var. Beynlxalq aləmə baxanda hansı dövlətlərin Türkiyəyə mənfi münasibət bəslədiyini gördükdə heç bir şübhə qalmır ki, onlar bu hadisələrin törədilməsində maraqlı ola bilərlər və hətta təşkilatçı ola bilərlər, çünki çox güclü təxribatçı qrupları və kəşfiyyat orqanları var.

Ərdoğanın Bakıya səfəri ərəfəsində iki dəfə terror aktının törədilməsinə və bunun Ərdoğanın Bakı səfərini təxirə salınmağa hesablanmasına inanmıram. Ona görə ki, Bakı o qədər də böyük imkan sahibi deyil ki, Ərdoğan buraya gələndən sonra hansısa siyasətin dəyişməsinə şərait yaradan qərar qəbul etsin. Hər dəfə Ərdoğanın Bakı səfəri ərəfəsində baş verən terror aktlarını təsadüfi sayıram və bu terror aktlarının şəxsən Ərdoğana və Türkiyəyə qarşı təşkil edilmiş təxribat hesab edirəm.

Türkiyəyə qarşı təşkil edilən terror aktlarında üçüncü qüvvənin tapılması Türkiyə kəşfiyyatının işidir. Terror çarəsiz insanların və təşkilatların əl atdığı mübarizə üsuludur. Əgər ölkədə ədalətli məhkəməyə ümid yoxdursa, qanunların işləməsinə, insanların himayəsinə ümid yoxdursa, o zaman insanlar və təşkilatlar terrora əl atırlar. Burada tənqid xüsusi xidmət orqanlarına deyil, insanların səsini eşitməli, ölkədə islahatlar keçirməli olan hökumətə yönəlməlidir".

Səxavət Məmməd
Ölkə.Az