"Əfv sərəncamı ABŞ-Azərbaycan münasibətlərinə təsir edə bilər, amma..."

İlham Əliyevin imzaladığı əfv sərəncamına əsasən siyasi məhbuslar da azadlığa çıxıb.

Bir müddət öncə Qərbin, xüsusilə ABŞ-ın siyasi məhbuslara görə Azərbaycana sanksiyalar tətbiq edəcəyi deyilirdi. Maraqlıdır bu addımdan sonra Qərblə Azərbaycan arasında münasibətlər hansı formada davam edəcək?

Bu məsələ ilə bağlı Türk-slavyan hərəkatının lideri, politoloq Adıgözəl Məmmədov Ölkə.Az-a danışıb:

"İstənilən şəxs törətdiyi əməllərinə görə qanun qarşısında cavab verməlidir. Siyasi mənsubiyyətindən, cəmiyyətdə tutduğu mövqeyindən, yüsək ranqlı məmur olmağından aslı olmayaraq bütün insanlar öz əməllərinə görə qanun qarşısında cavab verməlidir. Ümumiyyətlə ciddi dövlətlərdə bu belə olmalıdır.

Azərbaycanda iqtisadi, coğrafi, siyasi maraqları olan dövlətlər var. Bəzən mövcud siyasi rejimlərə təsir etmək üçün siyasi məhbus və ya digər vasitələrdən təzyiq vasitəsi kimi istifadə edirlər. Etiraf edək, bəzən elə insanlara siyasi məhbus deyirlər ki, faktiki olaraq o adam dələduzluq, fırıldaqçılıq üstündə həbs olunub. Bu gün Azərbaycanda marağı olan müəyyən qruplar var. Əgər onların maraqları təmin olunmursa, bu gün Əhmədi siyasi məhbus sayırdısa, sabah da Həsəni siyasi məhbus sayacaq. Bəzən Azərbaycanda tam dəqiq tədqiqatlar aparılmadan, araşdırılmadan həbslər edilir. Bu sahədə hüquq mühafizə orqanlarının üzərinə də böyük iş düşür.

Siyasi məhbus sayılan şəxslərin azadlığa çıxmasından sonra Qərblə Azrbaycan arasındakı münasibətlərdə yumuşama ola bilər. Ancaq müəyyən prinsipial məslələrdə Qərbin Azərbaycana qarşı siyasəti davam etdiriləcək".

Səxavət Məmməd
Ölkə.Az