Razi Nurullayev: "Hökumətin həmsədrlərlə görüşdən imtina etməsini tələb edirik"
"Hərbi əməliyyatların dayandırımasına hamı üzülüb. Haqqımız da var. Bir də tarixi şərait nə zaman yetişəcək ki..."
Bu sözləri cəbhə xəttində 3 günlük gərgin vəziyyətdən sonra atəşkəs elan olunmasına münasibət bildirən Azərbaycan Xalq Cəbhəsi Partiyasının sədri Razi Nurullayev deyib. Partiya sədri qeyd edib ki, Rusiya, ABŞ, Avropa Birliyi, ATƏT Minsk Qrupu və bir sıra beynəlxalq təşkilatların Azərbaycandan hərbi əməliyyatların dayandırılmasını tələb etməsi başadüşülən deyil:
"Bizlə az qala hədə-qorxu dili ilə danışırlar. Hörmətli cənab Putin, hörmətli Sergey Lavrov, ABŞ-ın vitse-prezidenti hörmətli Co Bayden, turist səfərinə çıxmaqdan doymayan hörmətli həmsədrlər! Siz ki, bizə təzyiq göstərirsiniz və Ermənistanı qoruyursunuz, deyin görək Qarabağı qaytaracaqsınızmı? Sizin yeriniz istidir, cibinizdə pulunuz, gələcəyiniz parlaq, torpaqlarınız yerində. Bəz düşünmürsünüz ki, bir milyon insan hansı əzab-əziyyətlə yaşayır və torpaq yanğısı ilə alışıb tutuşur? Atəşkəsdir. Dediyiniz oldu. İndi gəlib bizə moizə oxuyacaqsınız. Mən fərd olaraq Azərbaycan prezidentindən, hökumətindən həmsdərlərlə görüşdən imtina etməyi tələb edirəm. Partiya olaraq da bunu tələb edirik".
"Azərbaycan niyə onlara boyun əyməlidir? Neyləyəcəklər bizə? Başımıza atom bombası atacaqlar?" deyən AXCP sədri bildirib ki, xalq bir olsa bütün maneələri dəf edə bilər:
"Nə atırlar atsınlar, amma biz davamlı olsaq, bir olsaq, onların hamısını dəf edərik. Azərbaycan hakimiyyəti bu yaranmış şəraitdən istifadə etməli idi. Geri çəkilmək yox. Nə müxalifətdən, nə də başqalarından ehtiyat etmək yox. Hamı birdir. Qəti qərar verib torpaqların azadlığı uğrunda ölüm-dirim savaşına qalxmaq vaxtıdır. Azərbaycandan atəşkəs tələb edənlərdən, Ermənistanın işğalçı rejiminin arxasında dayananlardan isə tələb birdir. Ya, işğal altında olan yeddi rayon qeyd-şərtsiz azad olunur, ya da Azərbaycan müharibə elan edəcəkdir
