"Hər iki ölkəyə külli miqdarda silah satmışıq"
Rusiyanın baş nazirinin müavini Dmitri Roqozin son günlər Qarabağda yaranmış vəziyyətdən danışıb.
Ölkə.az xəbər verir ki, Roqozin münaqişə tərəflərinə Rusiyanın silah satdığı haqda məlumatları təsdiqləyib. O, bildirib ki, hər iki ölkə Rusiyanın "strateji tərəfdaşlarıdır".
"Azərbaycanla silah sahəsində 2000-ci ildən əməkdaşlıq edirik. Ən iri partiya silah alışı Bakı ilə Moskva arasında 2010-cu ildə baş tutub. Həmin il Azərbaycana 4 milyard dollarlıq müxtəlif növ silah, hərbi texnika satılıb. Bu müqavilə əsasında Azərbaycan 100 ədəd T-90C tankı, 100 ədəd BMP-3 zirehli döyüş maşını, 18 ədəd uzaqvuran özüyeriyən artilleriya qurğusu (САУ 2С19М1 «Мста-С»), 18 ədəd САУ 2С31 «Vena» tipli özüyeriyən artilleriya qurğusu, 18 ədəd "Smerç" reaktiv artilleriya sistemi, 18 ədəd TOS-1A "Solçepek" reaktiv atəş sistemi, 10 ədəd "Xarizantema-C" tank əleyhinə özüyeriyən maşın və 300 ədəd "İqla-C" zenit raket qurğusu alıb. Bundan başqa Azərbaycana iki S-300 PMU-2 "Favorit" divizyonu və bir neçə ədəd "Top-M2E" tipli zenit-raket kompleksi satılıb. Azərbaycan hərbi hava qüvvələrinə isə 60 ədəd Mi-17 hərbi nəqliyyat helikopteri və 24 ədəd Mi-35M hücum helikopteri satılıb.
Ermənistana satdığımız silah isə az olub. Ermənistana 35 ədəd T-72 tankı 110 ədəd müxtəlif tipli zirehli texnika və 50 ədəd mobil zenit-raket qurğusu verilib. Bu yaxınlarda Ermənistana ayıracağımız kreditin dəyərində gələcəkdə bu ölkəyə "Smerç", "İqla", TOS-1A "Solnçepek" reaktiv atəş sistemləri də verəcəyik", deyə Roqozin bildirib.
