\"Yalnız Ermənistan işğal etdiyi torpaqlardan çəkildikdən sonra Dağlıq Qarabağın statusunu müzakirə edə bilərik\"

Cəbhədə bir neçə günlük döyüşlərdən sonra atəşkəs haqqında razılığa gəlindi.

Bundan sonra Ermənistan və Azərbaycan arasında sülh danışıqları yenidən start götürəcək. Sülh danışıqlarının bundan sonra necə keçəcəyi maraq doğuran əsas məsələlərdən biridir.

Cəbhədə baş verən hadisələr və bundan sonrakı mərhələ barədə Türk-slavyan hərəkatının lideri, politoloq Adıgözəl Məmmədov Ölkə.Az-a danışıb:

"Bir neçə gün bundan əvvəl Rusiya telekanalına canlı qoşulmuşdum. Həmin verilişdə Rusiya prezidentinin Dağlıq Qarabağ üzrə keçmiş nümayəndəsi olmuş Kazimirov da iştirak edirdi. Kazimirovdan başqa verilişdə Rusiyanın hərbi və siyasi ekspertləri iştirak edirdilər. Orada açıq şəkildə bildirdim ki, Azərbaycan Rusiyanın bu mövzuda məntiqli təkliflərindən heç vaxt vaz keçmir. Azərbaycan ümumiyyətlə bu məsələlərdə Rusiyanın daha aktiv rol oynamasını istəyir. Rusiyanın bu münaqişədə açar olduğuna bilirik, ancaq BMT-nin işğal olunmuş torpaqlarımızla bağlı 4 qətnaməsi var, bunlara əməl olunmalıdır. Qətnamənin şərtlərinə əsasən ermənilər işğal etdiyi torpaqlarımızdan çəkilməlidir.

Azərbaycan tərəfi bundan sonra danışıqlar masası arxasında məsələni bu cür də qoymalıdır. Ermənilər işğal etdiyi torpaqlardan çəkildikdən sonra Dağlıq Qarabağın statusu barədə danışıqlar apara bilərik. O da Azərbaycanın tərkibində olmaq şərti ilə. Bizim xalq burada bir qədər təmkinli olmalıdır. Burada bir neçə insanın deyil, dövlətin taleyi həll olunur".

Səxavət Məmməd
Ölkə.Az