\"Bir anlıq təsəvvür edin ki, Ermənistan Rusiyadan üz çevirdi...\"

Ermənistanda Rusiya əleyhinə aksiyalar başlayıb.

Ermənistanın paytaxtı İrəvandakı Rusiya səfirliyi qarşısına bir qrup radikal millətçi yığışaraq Putini və rus xalqını təhqir edib, "Qarabağ bizimdir", "Rusiya düşməndir", "Yaşasın azad müstəqil Ermənistan" kimi şüarlar səsləndiriblər. Etirazçılar İrəvandakı Rusiya səfirliyini lax yumurta atəşinə tutublar.

Ermənistanda baş verən daxili bölünmə Qarabağ münaqişəsinin həllində hansı təsiri göstərə bilər. Ermənistan Rusiyadan imtina edə bilərmi?

Bununla bağlı politoloq Zərdüşt Əlizadə Ölkə.Az-a açıqlama verib:

"Ermənistan Rusiyanın strateji müttəfiqidir. Eyni zamanda Ermənistanın hakim zümrəsi və erməni xalqı anlayır ki, Rusiyanınn yardımı, himayəsi olmasa, Ermənistan nə Qarabağı saxlaya bilər, nə də, ümumiyyətlə dolana bilər. Ona görə də, erməni cəmiyyətindəki bir ovuc başdan xarab adamın Rusiya səfirliyi qarşısında etiraz aksiyasi təşkil etməsi Rusiya-Ermənistan münasibətlərinə zərrə qədər də təsir etməyəcək.

Təsəvvür edək ki, birdən-birə etiraz edən azlığın radikal təklifi qəbul olundu, Ermənistan Rusiyadan üz çevirdi, MDB-dən çıxdı. O zaman nə olacaq? Səhərisi gün Azərbaycan hücum edib Qarabağı alacaq və Ermənistan hakim zümrəsinin xalqa yedirtdiyi "möhtəşəm qələbə qazanmışıq, ilk dəfə tariximizdə türkləri məğlub etmişik və qədim erməni torpaqları olan Artsaxı azad etmişik" kimi fikirlərinə heç bir əsas qalmayacaq. Xalq ayağa qalxacaq, hakim zümrəni devirəcək, onlar da qanunsuz əldə etdikləri milyonlardan məhrum olacaqlar. Ona görə də, heç kəs Ermənistanda Rusiya ilə münasibətləri pozmaq haqqında bir an belə ciddi düşünmür".

Səxavət Məmməd
Ölkə.Az