"Rusiya Qarabağ probleminin həllini öz inhisarına alıb"

Qarabağda baş verən bir neçə günlük döyüşlərdən sonra sülh danışıqları yenidən başlayacaq.

Müharibə zamanı müxalifətlə iqtidarın bir nöqtəyə vurduğunu hər kəs gördü. Ancaq sülh danışıqları zamanı alına biləcək qərarlar ölkə daxilində bəzi problemlər yarada bilər. Buna görə də, müxalifətlə iqtidarın ortaq mövqe nümayiş etdirməsi üçün bəzi addımlar atılmaqdadır. AXCP Qarabağ münaqişəsi ilə bağlı Vahid Qərar Şurasının yaradılmasını təklif edib.

Politoloq Qabil Hüseynli Qarabağ münaqişəsi ilə bağlı iqtidarla müxalifətin necə davranmasını Ölkə.Az-a açıqlayıb:

"Qarabağ məsələsi və onun ətrafında cərəyan edən proseslər ümumilli məsələdir. Burada hər hansı siyasi alver, siyasi xal qazanmaq, yaranmış vəziyyətdən iqtidarın tənqidi üçün istifadə etmək yolverilməz hadisədir. Partiyalar öz proqramlarında bunu yerləşdiriblər ki, ümummilli məsələlərdə iqtidarla ortaq mövqedən çıxış edəcəklər. Bu xüsusilə Qarabağ probleminin həllinə aiddir. Son döyüşlər ətrafında fikirlərin haçalaşdığını demək olar ki, görmədik. Bir məsələdə bəzi fərqli fikirlər səsləndi ki, ordumuz hücumu davam etdirməli və qələbə qazanmalı idi. Bunu deyən şəxslər bir şeydə səhv edirlər ki, Qarabağ problemi artıq qlobal bir problemdir. Xüsusilə yaxın qonşumuz olan Rusiyanın nəzarəti altında olan bir bölgədir. Bu problemin həlli ilə ATƏT-in Minsk qrupu məşğul olur. Bu məsələdə istədiyimiz kimi hərəkət etsək dünyadan alacağımız təpkilər fərqli ola bilər. Bu məsələdə Rusiyanın rəyini almadan hərəkət etmək olmaz və bu risklidir.

Əgər müharibə davam etsə idi, Qarabağ probleminin həllinə nail olmaq mümkün idi. Rusiya buna imkan vermədi. İşğalçı dövlət ordusunun axıra qədər əzilməsinin qarşısını aldı. Müharibənin dayandırılmasına, atəşkəsin yenidən bərpasına nail oldu. Rusiya "sülhyaratma prosesini" öz inhisarına alıb. Özünün təklif etdiyi sülh müqaviləsinin hazırlandığını iddia edir.

Danışıqların məzmunu necə olacaq, hansı fikirlər irəli sürülücək, bunlar hamısı mülahizələr əsasında formalaşdırılır. Rusiyanınn ortaya atdığı və Kazanda əldə edilmiş razılaşmalara əsaslanan gah Kazan görüşmələrinin nəticələri, gah da Lavrov prinsipləri adlanan prinsiplər əsasında münaqişənin həll edilməsini irəli sürürlər. Ona görə də, məsələnin irəlidə gərgin olacağını təxmin etmək mümkündür. Azərbaycan ərazi bütövlüyünün təmin edilməsini və bölgədən bütün erməni qoşunlarının çıxarılmasını istəyir. Əvvəlki illərdən fərqli olaraq bu məsələdə Azərbaycanı dəstəkləyən dövlətlərin, beynəlxalq təşkilatların sayı xeyli artıb. Bu məsələdə Azərbaycan deyə bilərəm ki, dünyanın dəstəyinə nail olub.

Daxildəki qüvvələr də, müəyyən konpromislərin, uzlaşmamaların ortaya çıxacağı təqdirdə hay-küy qoparmamalıdır. Atılmış addımların mövcud reallıqları nəzərə alaraq atıldığını qəbul etməlidirlər. Azərbaycan super dövlət deyil ki, super dövlətlərlə çarpışıb öz ərazi bütövlüyünü özü təmin etsin. İrəlidə kompromislərin olacağını istisna etmirəm. Ola bilsin ki, bəzi şeylər Azərbaycana istədiyi qədər verilməsin. Yalnız Dağlıq Qarabağ məsələsində Azərbaycanla Ermənistan arasında qarşıdurmanın yaşanacağını və bütövlükdə bu məsələyə dair ortaq bir qərarın əldə oluna bilməyəcəyi göz önündədir. Azərbaycan ictimai fikri indidən bu kompramislərə hazırlanmalıdır".

Səxavət Məmməd
Ölkə.Az