\"İsveçi hədələmək əvəzinə Lavrov Qarabağla bağlı verdiyi vədi yerinə yetirsə daha yaxşı olardı\"

Rusiya xarici işlər naziri Sergey Lavrov İsveçi təhdid edib.

Sergey Lavrov İsveçin NATO-ya üzv olması ilə bağlı bildirib ki, əgər İsveç NATO-ya daxil olarsa, bu Rusiyada belə təsəvvür yaradacaq ki, İsveç hər an bizə hücum etməyə hazırdır. Biz bunu belə qəbul edəcəyik. Lavrov əlavə olaraq deyib ki, biz öz şimal sərhədlərimizdə ciddi hərbi-texniki tədbirlər görmək məcburiyyətində qalacağıq.

Bununla bağlı hərbi ekspert Üzeyir Cəfərov Ölkə.Az-a danışıb:

"Lavrovun bu fikri anlaşılmazdır. Rusiya nə baş verir versin, öz narahatçılığını ifadə edir. Rusiya İsveçə necə mane ola bilər? NATO-ya daxil olmaq İsveçin qərarıdır və Rusiya buna hörmətlə yanaşmalıdır. Heç kim Rusiyaya hücum etməyə hazırlaşmır. Necə ki, ermənilərin gözünə hər şey Azərbaycan əsgəri, Azərbaycan tankı kimi görünür, eləcə də Rusiya hər yerdə NATO görür və bunu özlərinə təhlükə, təhdid qəbul edirlər. Lavrov deyir, cavab addımları atılacaq. Rusiyaya kim deyir ki, cavab addımları atma?

Rusiya sülhsevər siyasət aparacaqsa, heç bir dövlət nə onlara hücum edəcək, nə də hansısa dövlət Rusiya ilə bağlı pis niyyətə düşəcək. Rusiya İsveçin NATO-ya daxil olmaq qərarına hörmətlə yanaşmalıdır. NATO genişlənmək istəyirsə və yaxud hansısa bir dövlət hərbi alyansa qoşulmaq istəyirsə, bu onların azad seçimidir. Lavrovun bu açıqlaması ilə bir daha Rusiya özünü çox çətin vəziyyətə qoydu.

Yaxşı olardı ki, Lavrov Dağlıq Qarabağla bağlı vəd etdiyi sülhlə məşğul olardı. Lavrov müharibə təhlükəsi ilə üz-üzə qalmış regionu qoyub, gedib başqa məsələlərlə məşğul olmasın. Üzərinə düşən vəzifəni yerinə yetirsin. Guya o, Qarabağla bağlı məsələni həll edəcəkdi, ancaq görünən odur ki, onlar yetənə yetir, yetməyənə də bir daş atırlar. Rusiya bu siyasətindən əl çəkməlidir, çünki bu siyasət sonda Rusiyanı çox kritik bir vəziyyətə sala bilər".

Səxavət Məmməd
Ölkə.Az