\"Faktiki olaraq Rusiya münaqişə tərəfi kimi çıxış edir\"

Aprel ayının əvvəlində baş verən hərbi əməliyyatları dayandırmaq üçün əldən ayaqdan gedən Rusiya səssizliyə qərq olub.

Bir neçə gündür cəbhədə hər gecə atışmalar gedir, ancaq danışıqların başlayacağını bildirən Rusiya buna reaksiya vermir. Bu azmış kimi erməni prezidenti Sarkisyan sülh danışıqlarının mənasız olduğunu bildirib. Rusiya ilə yanaşı Qərb də baş verənlərə səssiz qalıb.

Politoloq Zərdüşt Əlizadə cəbhədə baş verənlərə Ölkə.Az-da müasibət bildirib:

"Ermənilər atəşkəsi pozanda Azərbaycan tərəfi də sakit durmur, biz də erməni mövqelərini vururuq. Erməni tərəfin də itkiləri var. Ermənistanın müstəqil siyasətindən danışmağa dəyməz. Ermənistanın siyasəti yox, Rusiyanın siyasəti var, sadəcə bunu Ermənistanın əli ilə, onun adından həyata keçirir. Məqsəd odur ki, atışmaların mümkünsüz olacağı mexanizm yaratsınlar. Burada Azərbaycan öhdəlik götürməlidir ki, hərbi gücdən istifadə etməyəcək. Bu o deməkdir ki, münaqişə dondurulacaq və danışıqlar 25-30 il davam edəcək. Ermənistan hərbi gərginliyə çətinliklə dözür. Azərbaycanla müqayisədə Ermənistanın imkanları xeyli məhduddur, həm bəşəri, həm maddi, həm də hərbi cəhətdən.

Rusiya çalışır ki, münaqişəni yenidən dondursun, atışmalarsız, hərbi əməliyyatlarsız danışıqlar getsin. Ermənistan da iki ayağını bir başmağa dirəyəcək ki, işğal etdiyimiz torpaqlardan çıxmıram. Dağlıq Qarabağın müstəqilliyini tanımalısınız. Bu, Rusiyanın istəyidir. İdarə olunan münaqişənin vasitəsi ilə bütün bölgəni öz əlində saxlamaq Rusiyanın açıq-aydın siyasətidir. Son atışmalar da bunun nəticəsidir. Atışmaları Rusiya başlamışdı, Rusiya da saxladı, Rusiya yenə davam elətdirir. Rusiyanın qarşısına qoyduğu əsas məqsədlərdən biri də odur ki, atışmalar intensiv olsun və o da bundan istifadə edib beynəlxalq aləmə car çəksin, sonra da öz sülməramlılarını bölgəyə yerləşdirsin.

Qərb səssiz görünsə də, bu münaqişədən öz xeyrini götürür. Hər bir kəs bu münaqişədən öz xeyrini götürür, Azərbaycan və erməni xalqlarından başqa. İtirən Azərbaycan və erməni xalqlarıdır. Qərb də, Rusiya da Qarabağdakı hərb və sülhdən öz xeyirləri üçün istifadə edirlər. Guya Ermənistanla Azərbaycanı barışdırırlar. İşğalçıya siyasi, maliyyə, informasiya dəstəyi verirlər. Faktiki olaraq Rusiya münaqişə tərəfi kimi çıxış edir".

Səxavət Məmməd
Ölkə.Az