"NATO Rusiyanın cavabını çox yaxın zamanlarda verəcək"

Rusiya ilə NATO münasibətləri hər keçən gün daha da gərginləşir

Bir neçə gün öncə rus hərbi təyyarələri NATO hərbi gəmisinin üzərindən uçuş həyata keçirdi. Dünən isə Rusiyanın sualtı qayıqları Baltik dənizində, Latviya sahillərində görünüb. Hər keçən gün gərginləşən Rusiya-NATO münasibətlərinin müharibə ilə nəticələnəcəyi iddia edilir.

Rusiya və NATO münasibətləri barədə hərbi ekspert Üzeyir Cəfərov Ölkə.Az-a danışıb:

"Rusiyanın apardığı siyasəti anlamaq olmur. Rusiya yetənə yetir, yetməyənə bir daş atır. NATO ilə kəllə-kəlləyə gəlmək Rusiyanın sonunu yaxınlaşdırmaq deməkdir. Rusiya hərbi təyyarələrini NATO gəmisinin 10-15 metrliyindən uçurur. Sual olunur, NATO gəmisinin üzərindən niyə uçursan, o gəmi sənə hansı problemi yaradır? Ötən ilin noyabrın 24-də Türkiyə Rusiyaya aid hərbi təyyarəni vuraraq Rusiyaya tərs sillə ilişdirdi, NATO-da bunu edə bilər. Yaxın zamanlarda bunun baş verməsi gözlənilir. Rusiya ya çaşqın vəziyyətdədir, ya da rus generalları anlaqlı surətdə bu qərarı vermirlər. Bu azmış kimi, Rusiya hərbi sualtı qayıqlarını da işə salıb.

Azərbaycan, Ermənistan, Ukrayna, Gürcüstan yalan olacaq. Tezliklə NATO Rusiyaya yerini göstərəcək. Rusdan qorxan adam ümumiyyətlə Azərbaycandan çıxıb getməlidir. Rusdan niyə qorxurlar? Rus başını itirib. Rusiya şimali Qafqazda çeçen dəstələri və Dağıstanda silahlılarla bacarmırsa, müasir silah-sursata malik olan ölkə niyə rusdan qorxmalıdır? Rusun nüvə silahı olduğu kimi digər ölkələrin də nüvə silahları var. Rusiya bir hərəkət edəcəksə, başqa ölkələr ona qarşı 10 hərəkət edəcək. Ona görə də, bu rus mifini, xofunu dağıtmaq lazımdır. Hamı qorxur ki, biz Dağlıq Qarabağa tərəf baxmamalıyıq, yoxsa, Rusiya bizi cəzalandıracaq. Rusiyanın işi ancaq natəmiz işlərlə məşğul olmaqdır. Rusiya Azərbaycana yalvardı, yaxardı ki, atəşkəs olsun, indi də Ermənistanı silahlandırır ki, iki xalq bir-birini qırsın, onlar da münaqişə tərəflərinə silah satsın. NATO bunun cavabını çox yaxın zamanlarda verəcək.

Rusiya Türkiyəyə çox hədə qorxu gəldi, sonra başa düşdü ki, Türkiyəyə qarşı bu hərəkətlər yolverilməzdir, indi isə yenidən Türkiyə ilə münasibətləri düzəltəməyə çalışır. NATO və ona daxil olan ölkələr Rusiyanın hərəkətlərindən beziblər və cana doyublar".

Səxavət Məmməd
Ölkə.Az