"Əgər ATƏT-in Minsk qrupu Qarabağ probleminin həllini istəyirsə..."

ATƏT-in Minsk qrupunun təşəbbüsü ilə Azərbaycan və Ermənistan prezidentləri Vyanada görüşəcəklər.

Görüşdə Rusiyanın xarici işlər naziri Lavrov və Minsk qrupunun həmsədr ölkələrinin xarici işlər nazirlərinin də iştirak edəcəyi gözlənilir. Görüşün nəticələri necə olacaq, prezidentlərin bu dəfəki görüşündən nələr gözləyə bilərik?

Bu məsələyə politoloq Elşən Manafov Ölkə.Az-a verdiyi açıqlamasında aydınlıq gətirib:

"Əgər ATƏT-in Minsk qrupunun həmsədr dövlətləri gerçəkdən Ermənistan iqtidarına qarşı təzyiqləri artırıblarsa və həqiqətən Minsk qrupunun tərkibindəki dövlətlər bölgədə sabitliyin və təhlükəsizliyin təmin olunmasında maraqlıdırlarsa, heç şübhəsiz bu danışıqların daha səmərəli müstəvi üzərində keçirilməsi üçün fərqli və israrlı mövqe ortalığa qoymalıdırlar. Məlum olsa ki, Ermənistan danışıqları sırf danışıqlar naminə aparır, bu halda Azərbaycan ordusu məsələnin münaqişənin məhz hərbi konteksdə öz həllini tapması üçün yenidən öz sözünü deməli olacaq. Ordumuzun hansı gücə və imkanlara malik olduğunu ötən ayın əvvələrində keçirilən 4 günlük hərbi əməliyyatlar göstərdi. Ermənistanın siyasətinə havadarlıq edən tərəflər də, ilk növbədə Rusiya, status kvo-nun pozula biləcəyi amillərdən narahat olaraq dərhal tərəfləri hərbi əməliyyatları dayandırmağa və atəşkəs sazişinə əməl etməyə çağırdı.

Güman edirəm ki, biz bu danışıqlarda fərqli bir nəticənin əldə ediləcəyini müşahidə edə bilərik. Əgər qeyri-konstruktiv mövqe sərgiləyən Ermənistan iqtidarına münasibətdə ATƏT-in Minsk qrupunda təmsil olunan həmsədr dövlətlərin təzyiqləri baş tutarsa, əgər ikili standartlardan bu münaqişəyə yanaşma davam edəcəksə, əvvəlki kimi ATƏT Ermənistanın siyasətinə havadarlıq edəcəksə və xiristian təəssübkeşliyi konteksində bu problemin çözülməsi ilə bağlı məsələlərə yanaşacaqsa, biz yenə bu danışıqların danışıqlar naminə aparıldığını müşahidə edəcəyik.

Azərbaycan tərəfi Qarabağ probleminin hərbi yolla həlli imkanlarına malik olduğunu qabarıq şəkildə ATƏT-in Minsk qrupunun həmsədri olan dövlətlərə də, beynəlxalq birliyə də göstərdi. Cənubi Qafqaz, ilk növbədə Azərbaycan, Avropanın enerji təhlükəsizliyinin təmin olunmasında kifayət qədər önəmli rol oynayan bir dövlətdir. Güman edirəm ki, hərbi əməliyyatların davam etdirilməsi bu baxımdan da Azərbaycana investisiya qoymuş Qərb şirkətlərinin kapitalla bağlı maraqlarına cavab verməməlidir. Digər tərəfdən status kvo-nun dəyişə biləcəyi amilləri də Rusiyanı narahat etməlidir.

Ümid edək ki, biz bu danışıqlarda Lavrovun təklif etdiyi məlum prinsiplərin həyata keçirilməsi üçün ilk addımların atılmasını müşahidə edəcəyik. Ən azı 5 rayonun qaytarılması ilə bağlı tərəflər arsında ilkin razılıq əldə olunarsa və Dağlıq Qarabağın hüquqi statusu ilə bağlı məsələlərə Azərbaycanın ərazi bütövlüyü çərçivəsində tərəflər yanaşacaqsa, münaqişənin tənzimlənməsi istiqamətində ilk pozitiv addımların Vyana görüşündə atılacağını istisna etməyə bilərik".

Qeyd edək ki, prezidentlər Dağlıq Qarabağ probleminin nizamlanması üçün Minsk qrupunun təşəbbüsü ilə gələn həftə Vyanada görüşəcəklər.

Səxavət Məmməd
Ölkə.Az