\"Əli Kərimli üçün Müsavat çoxdan hakimiyyətə satılmış bir partiyadır\"

Müsavat Partiyası və Əli Kərimlinin rəhbərlik etdiyi AXCP arasında əməkdaşlıqla bağlı danışıqların getdiyi barədə xəbərlər yayılıb.

Yayılan bu xəbər müxalif düşərgədə ən çox müzakirə edilən mövzuya çevrilib. Bəzi müxalif partiya liderləri bu danışıqların əbəs yerə aparıldığını iddia edir.

Müsavat Partiyası və Əli Kərimlinin rəhbərlik etdiyi AXCP arasında gedən danışıqlarla bağlı AXCP sədri Razi Nurullayev Ölkə.Az-a danışıb:

"Bu şəkildə gedən oyunlara qarşıyam. Yaddaşımda olan faktlar ondan ibarətdir ki, əvvələr də bir neçə dəfə Əli Kərimlinin Yurd təşkilatı və Müsavat Partiyası birləşmək üçün müəyyən danışıqlar aparıblar. Bir neçə dəfə koalisiya şəklində birləşiblər və hər dəfə də çox pis şəkildə qalmaqalla ayrılıblar. Hər bir zaman Azərbaycan xalqında müəyyən gözlənti yaradıb, sonra o gözləntini məhv ediblər. Mənə belə gəlir ki, bu cür birləşmə meyilləri, çağırışları insanları qıcıqlandırır. Hər kəs çox gözəl bilir ki, hər iki təşkilatın başında dayanan insanların iddiası çox böyükdür və heç biri digərinin vahid namizədliyini qəbul etməz. Onun üçün də birləşmələri mümkün deyil. Bu sadəcə insanların başını qatmaq üçün ortaya atılan bir oyundur. Bu əməkdaşlıq mümkün deyil, indiyə qədər də mümkün olmayıb. Partiyalar bir-birinə qarşı satqınlıqdan tutmuş, xəyanətə qədər ittihamlar irəli sürüblər.

Əli Kərimli üçün Müsavat çoxdan hakimiyyətə satılmış bir partiyadır. Müsavatın bir zamankı lideri İsa Qəmbər haqqında hakimiyyətə satılıb iddilları irəli sürülüb. Arif Hacılı haqqında da o cür iddilar son günlərə qədər irəli sürülürdü. Bundan sonra yenə onlar birləşmək, əməkdaşlıq barədə məsələlər irəli atırlarsa bu qəbuledilməzdir. İnsanlar artıq belə bir siyasəti qəbul etmək istəmir. Bunlar sadəcə kimlərinsə məqsədinə xidmət etmək üçün ortaya atılmış bir oyundur".

Səxavət Məmməd
Ölkə.Az