Qondarma Dağlıq Qarabağ respublikasının avropalı dostları kimlərdir?

Ölkə.Az erməni mətbuatına istinadən xəbər verir ki, dünən Avropa parlamentində "Ermənistanın avropalı dostları" təşkilatının təşəbbüsü ilə qondarma Dağlıq Qarabağ respublikası ilə dostluq qrupunun təqdimatı keçirilib. 

Bu qrupun məqsədi Dağlıq Qarabağda avropa dəyərlərinin yayılması, vətəndaş cəmiyyətinin inkişaf etdirilməsi və demokratik idarəetmə sisteminin qurulmasına stimul verməkdir. Oxşar qruplar Fransa və Litva parlamentlərində də yaradılıb. Artıq Avropa parlamentinin bəzi üzvləri bu qrupa qatılmaq istədiklərini dilə gətiriblər. Bu qrupa rəhbərlik isə Avropa xalq partiyası fraksiyasının üzvü Frank Engelə həvalə olunacaq.

Qrup həm də Avropa İttifaqının vəzifəli şəxsləri ilə qondarma respublikanın vətəndaş cəmiyyətinin üzvləri arasında əlaqələr yaradaraq avropalı nümayəndələrin regiona səfərlərini təmin edəcək. 

Qeyri-rəsmi qrup eyni zamanda qondarma Dağlıq Qarabağ respublikasının Avropa İttifaqının beynəlxalq qrup və proqramlarında təmsil olunmasında maraqlıdır.

 

"Biz insanların demokratik respublikaya uyğun siyasət aparan tanınmayan region barədə məlumatlandırılmasını istəyirik" - deyə qondarma Dağlıq Qarabağ respublikası ilə dostluq qrupunun rəhbəri Frank Engel bildirib.